اردو ورلڈ کینیڈا ( ویب نیوز ) روس کی درخواست پر سلامتی کونسل کابند کمرے کا اجلاس شام پر باغیوں کے قبضے سے پیدا ہونے والی صورتحال پر تبادلہ خیال کیا گیا۔
اسرائیلی نمائندے نے سلامتی کونسل کو لکھے گئے خط میں لکھا ہے کہ گولان کی پہاڑیوں پر اسرائیلی کارروائیاں محدود اور عارضی ہیں۔اسرائیلی مندوب نے اپنے خط میں لکھا ہے کہ اسرائیل شام میں مسلح گروہوں کے درمیان لڑائی میں مداخلت نہیں کر رہا اور ہمارے اقدامات ہماری اپنی سلامتی کے لیے ہیں۔اجلاس میں سعودی عرب نے کہا کہ اسرائیل نے بفر زون پر قبضہ کرکے شام کی سلامتی کو نقصان پہنچایا ہے۔
واضح رہے کہ بشار الاسد کے زوال کے بعد شام کے سابق صدر اور ان کے خاندان کو روسی صدر پوتن نے ماسکو میں سیاسی پناہ دی تھی جبکہ ایرانی حکومت نے شام کی نئی قیادت سے بھی رابطہ کیا ہے۔ایرانی وزیر خارجہ کا کہنا ہے کہ فاتح شامی افواج کا ایران کے ساتھ رویہ شام ایران تعلقات کا تعین کرے گا۔دریں اثنا، متحدہ عرب امارات نے شام کی ریاستی سالمیت اور اتحاد پر زور دیا ہے اور شامی جماعتوں سے حکمت اور افہام و تفہیم کا مظاہرہ کرنے کا مطالبہ کیا ہے۔
حماس نے شامی عوام کو آزادی اور انصاف کی جدوجہد میں کامیابی پر مبارکباد دی ہے جبکہ لبنانی تنظیم حزب اللہ نے شام میں تبدیلی کو خطرناک قرار دیا ہے۔کینیڈا نے اسد حکومت کے خاتمے کا خیر مقدم کیا ہے جبکہ برطانیہ، فرانس، جرمنی، آسٹریا اور یونان نے شامی پناہ گزینوں کی درخواستوں پر کارروائی روک دی ہے۔
