اردو ورلڈ کینیڈا ( ویب نیوز ) برطانوی نشریاتی ادارے بی بی سی کے مطابق حیفا شہر میں عارضی طور پر ایک بڑا زیر زمین ہسپتال قائم کیا گیا ہے جہاں مریضوں کے سینکڑوں بستر لگائے گئے ہیں۔ رپورٹ میں بتایا گیا ہے کہ جس جگہ پر ہسپتال بنایا گیا ہے وہ پارکنگ پلازہ ہے جسے اسرائیل کے رامبم میڈیکل سینٹر نے 2006 میں اسرائیل اور لبنانی مزاحمتی تنظیم حزب اللہ کے درمیان جنگ کے دوران تعمیر کیا تھا۔

بی بی سی کے مطابق اسپتال میں 2 ہزار افراد کے لیے بستر ہیں اور تمام ضروری اشیا اور طبی آلات اسپتال میں محفوظ ہیں تاہم اس وقت اسپتال میں کوئی بھی مریض زیر علاج نہیں ہے۔ خبر کے مطابق ایران اور اس کے اتحادیوں کے ممکنہ حملے کے بعد زخمیوں اور دوسرے اسپتالوں میں زیر علاج افراد کو یہاں منتقل کیا جا سکتا ہے۔ واضح رہے کہ حماس کے سیاسی شعبے کے سربراہ اسماعیل ھنیہ کی شہادت کے بعد ایران اور اس کی اتحادی مزاحمتی قوتوں نے اسرائیل سے انتقام کا اعلان کیا ہے۔