اردو ورلڈ کینیڈا (ویب نیوز ) اسرائیل نے غزہ کی پٹی پر حملے میں ہلاک ہونے والے 88 فلسطینیوں کی لاشیں واپس کر دی ہیں لیکن غزہ کی وزارت صحت نے انہیں یہ کہتے ہوئے دفن کرنے سے انکار کر دیا ہے کہ اسرائیل کو پہلے ان کی شناخت اور ان جگہوں کی تصدیق کرنی چاہیے جہاں وہ مارے گئے تھے۔لاشوں کو ایک کنٹینر میں اسرائیل کے زیر کنٹرول کراسنگ کے ذریعے غزہ پہنچایا گیا، لیکن فلسطینی حکام کا کہنا ہے کہ مرنے والوں کی شناخت، ان کی عمروں یا انہیں کہاں قتل کیا گیا اس بارے میں کوئی معلومات فراہم نہیں کی گئیں۔
خان یونس کے ناصر ہسپتال کے حکام نے انہیں ملنے اور دفن کرنے سے انکار کر دیا اور ریڈ کراس کی بین الاقوامی کمیٹی سے اسرائیل سے تفصیلات طلب کرنے کو کہا۔وزارت نے کہا کہ فلسطینی وزارت صحت نے کنٹینر وصول کرنے کا عمل اس وقت تک معطل کر دیا ہے جب تک کہ ان لاشوں کے بارے میں تمام ڈیٹا اور معلومات مکمل نہیں ہو جاتیں تاکہ ان کے اہل خانہ ان کی شناخت کر سکیں۔غزہ میں سرکاری انفارمیشن آفس کے ڈائریکٹر جنرل اسماعیل الثوبطہ نے کہا کہ وزارت صحت کے حکام نے ٹرک ڈرائیور سے کہا تھا کہ وہ ہلاک ہونے والے فلسطینیوں کی لاشوں کو اسی اسرائیلی کراسنگ پر واپس لے جائے جہاں سے وہ آئے تھے۔
