اردو ورلڈ کینیڈا ( ویب نیوز ) غزہ میں اسرائیلی جارحیت کا سلسلہ نہ رک سکا ، مزید 36 فلسطینی شہید ہوگئے۔
غزہ کے شہری دفاع کے ادارے کے مطابق ہفتے کے روز اسرائیلی فورسز کی فائرنگ سے کم از کم 36 فلسطینی ہلاک ہوئے، جن میں چھ امریکی حمایت یافتہ امدادی مرکز کے قریب بھی شامل ہیں۔یہ واقعہ رفح میں غزہ ہیومینٹیرین فنڈ (GHF) کے امدادی مرکز کے قریب پیش آیا، جس نے فائرنگ کے حالیہ واقعات کی وجہ سے امداد کی تقسیم کو عارضی طور پر روک دیا تھا لیکن اس کے بعد سے دوبارہ شروع ہو گیا ہے۔
غزہ میڈیا آفس کے مطابق 27 مئی سے 6 جون کے درمیان رفح میں امدادی مقامات پر اسرائیلی حملوں میں 100 سے زائد فلسطینی شہید اور 581 زخمی ہوئے۔ادھر اقوام متحدہ کے ورلڈ فوڈ پروگرام نے غزہ تک امدادی رسائی کی فوری بحالی کا مطالبہ کیا ہے۔دوسری جانب اسرائیلی فوج نے شمالی غزہ کے مزید علاقوں سے جبری انخلاء کے احکامات جاری کر دیئے۔واضح رہے کہ غزہ میں عید کے پہلے روز جمعہ کو اسرائیلی فضائی حملوں اور گولہ باری کے نتیجے میں مزید 42 فلسطینی شہید ہوگئے تھے۔غزہ کی وزارت صحت کے مطابق غزہ پر اسرائیل کی جنگ میں اب تک کم از کم 54,677 فلسطینی ہلاک اور 125,000 سے زائد زخمی ہو چکے ہیں۔
