اردو ورلڈ کینیڈا ( ویب نیوز ) پاکستان نے ایران پر اسرائیلی حملوں کو جارحیت قرار دیتے ہوئے کہا ہے کہ یہ کارروائی علاقائی امن کے لیے خطرہ ہے اور ایران کو اپنے دفاع کا مکمل حق حاصل ہے۔
پاکستان نے اسلامی جمہوریہ ایران کے خلاف اسرائیل کی بلاجواز جارحیت کی شدید مذمت کی ہے اور عالمی برادری سے اسرائیل کی جارحیت کو فوری طور پر روکنے کا مطالبہ کیا ہے۔دفتر خارجہ کے ترجمان نے کہا ہے کہ اسرائیلی فوجی حملے ایران کی خودمختاری اور علاقائی سالمیت کی سنگین خلاف ورزی ہیں۔ یہ حملے اقوام متحدہ کے چارٹر اور بین الاقوامی قانون کے بنیادی اصولوں کی واضح طور پر نفی کرتے ہیں۔بیان میں اس بات پر زور دیا گیا کہ اسلامی جمہوریہ ایران کو اقوام متحدہ کے چارٹر کے آرٹیکل 51 کے تحت اپنے دفاع کا مکمل حق حاصل ہے۔پاکستان نے ایرانی عوام کے ساتھ مکمل یکجہتی کا اظہار کرتے ہوئے اسرائیل کی کھلی اشتعال انگیزیوں کی شدید مذمت کی۔
بیان میں مزید کہا گیا ہے کہ اس طرح کے اقدامات سے پورے خطے کے امن، سلامتی اور استحکام کے لیے بہت سنگین خطرہ ہے اور اس کے دور رس نتائج ہو سکتے ہیں۔ وزارت خارجہ نے بین الاقوامی برادری اور اقوام متحدہ پر زور دیا ہے کہ وہ فوری طور پر بین الاقوامی قانون کا دفاع کریں، اسرائیلی جارحیت کو روکیں اور جارح ملک کو اس کے اقدامات کے لیے جوابدہ ٹھہرائیں ۔
