اردوورلڈکینیڈا(ویب نیوز)ایران کے دارالحکومت تہران میں پاکستانی سفارتخانے کے اطراف اسرائیل کی جانب سے بمباری کی گئی، جس کے دوران پاکستانی سفارتی عملے کو کوئی نقصان نہیں پہنچا۔

سفارتی ذرائع کے مطابق پاکستانی سفارتخانے کے سامنے ایرانی فوج کا مرکز ارتش واقع ہے، جبکہ پاکستانی سفیر مدثر ٹیپو پاسداران کے علاقے میں مقیم ہیں۔

ذرائع کا کہنا ہے کہ رات تقریباً آٹھ بجے دونوں علاقوں میں شدید بمباری کی گئی، تاہم پاکستانی سفارتخانے اور سفیر کی رہائشگاہ بالکل محفوظ رہی۔ پاکستانی سفیر مدثر ٹیپو تہران میں تقریباً بیس سفارتی اہلکاروں کے ساتھ معمول کے مطابق فرائض انجام دے رہے ہیں۔

سینئر سفارتکار نے بتایا کہ بمباری کی آوازیں بہت شدید تھیں اور عملہ دھماکوں سے پریشان ضرور ہوا، تاہم تمام اہلکار محفوظ ہیں اور خطرناک ماحول میں بھی اپنی ڈیوٹی انجام دے رہے ہیں۔

یہ واقعہ ایران میں جاری کشیدگی کے دوران پیش آیا ہے اور پاکستانی سفارتخانہ اس بات کی تصدیق کر چکا ہے کہ عملہ مکمل طور پر محفوظ ہے اور حالات زیر نگرانی ہیں۔