اردو ورلڈ کینیڈا ( ویب نیوز ) اسرائیل نے یمن کے حوثی باغیوں کی طرف سے اسرائیلی دارالحکومت تل ابیب پر ڈرون حملے کے جواب میں یمنی شہر حدیدہ پر فضائی حملہ کیا۔اسرائیل نے یمنی بندرگاہ حدیدہ پر فضائی حملہ کیا جس میں 3 افراد ہلاک اور 80 سے زائد زخمی ہوگئے۔ یمنی میڈیا کے مطابق اسرائیلی حملوں میں یمنی شہر حدیدہ کی بندرگاہ پر تیل کی تنصیبات کو نشانہ بنایا گیا جس میں 3 افراد ہلاک اور 87 افراد زخمی ہوگئے۔

اسرائیلی فوج کا کہنا ہے کہ اس کے جنگی طیاروں نے ہفتے کے روز یمن کے الحدیدہ بندرگاہ کے علاقے میں حوثیوں کے فوجی ٹھکانوں کو نشانہ بنایا ۔ادھر حوثی گروپ نے اپنے بیان میں کہا ہے کہ اسرائیلی حملوں کا موثر جواب دیں گے، اسرائیل میں اہم اہداف کو نشانہ بنائیں گے اور فلسطینیوں کی حمایت میں فوجی کارروائیاں جاری رکھیں گے۔

یاد رہے کہ جمعے کو اسرائیل کے دارالحکومت تل ابیب میں سفارت خانوں کے قریب ایک عمارت پر ڈرون حملے میں ایک شخص ہلاک اور متعدد زخمی ہوگئے تھے۔میڈیا رپورٹس میں بتایا گیا ہے کہ یمن کے حوثیوں نے اسرائیل پر ڈرون حملے کی ذمہ داری قبول کرتے ہوئے ڈرون حملے کو حماس کے 7 اکتوبر 2023 کے حملے کے بعد ایک بڑی کارروائی قرار دیا۔