اردو ورلڈ کینیڈا ( ویب نیوز ) اسرائیلی فوج کا مغربی رفح میں پناہ گزینوں کے کیمپ پر بڑا حملہ، 75 سے زائد فلسطینی شہید اور درجنوں زخمی ہو گئے، جن میں زیادہ تعداد خواتین اور بچوں کی ہے۔اطلاعات کے مطابق اسرائیل نے عالمی عدالت انصاف کے حکم کی دھجیاں اڑا دیں، اسرائیلی بمباری سے رفح پناہ گزین کیمپ کو آگ لگ گئی، آگ لگنے سے بڑی تعداد میں فلسطینی شہید ہوگئے۔
جھلسنے سے کئی افراد کی حالت تشویشناک ہے جب کہ مرنے والوں کی تعداد میں اضافے کا خدشہ ہے۔ اس حوالے سے ریڈ کراس نے کہا ہے کہ رفح میں اس کے فیلڈ ہسپتال میں لائے جانے والے مریضوں کی تعداد میں اضافہ ہو رہا ہے جبکہ دیگر ہسپتالوں میں بھی اضافہ ہو رہا ہے۔ مریضوں کی بڑی تعداد کو منتقل کیا جا رہا ہے۔
اسرائیلی فوج نے شمالی غزہ کے علاقے جبالیہ میں ایک گھر کو نشانہ بنایا جس میں 12 افراد شہید ہوگئے جب کہ گزشتہ 24 گھنٹوں کے دوران اسرائیلی فوج نے نصیرات، غزہ سٹی اور تل السلطان کیمپ کو بھی نشانہ بنایا جس کے نتیجے میں 160 فلسطینی شہید ہوگئے۔صہیونی فوج نے دعویٰ کیا ہے کہ وسطی اسرائیل میں جنوبی غزہ کے علاقے رفح سے آٹھ راکٹ فائر کیے گئے۔پناہ گزین کیمپ میں شمالی غزہ سے بے گھر فلسطینیوں کی ایک بڑی تعداد آباد ہے۔
اسرائیل کا دعویٰ ہے کہ اسرائیلی جیٹ طیاروں نے نیر الرفح میں حماس کے ایک کمپاؤنڈ پر حملہ کیا، جہاں حماس کے اہم ارکان حملے کی جگہ پر تعینات تھے۔دریں اثناء یورپی یونین کی خارجہ پالیسی کے سربراہ جوزف بوریل کا کہنا ہے کہ مشرق وسطیٰ میں امن کے قیام کے لیے ایک "مضبوط” فلسطینی اتھارٹی کی ضرورت ہے۔دوسری جانب لبنانی خبر رساں ایجنسی کے مطابق جنوبی لبنان کے علاقے ایتا شاب میں اسرائیلی ڈرون حملے میں کم از کم ایک شہری ہلاک اور دوسرا زخمی ہوگیا۔واضح رہے کہ غزہ میں اسرائیلی حملوں میں اب تک 36 ہزار فلسطینی شہید جب کہ 80 ہزار سے زائد زخمی ہوچکے ہیں جن میں بڑی تعداد خواتین اور بچوں کی ہے۔
