عالمی خبر رساں ادارے کے مطابق اسرائیل نے غزہ کے علاقے جبالیہ میں پناہ گزینوں کے کیمپ کو نشانہ بنایا۔ اس علاقے میں ایک ہسپتال اور ایک تاریخی مسجد بھی بمباری میں تباہ ہو گئی۔
جبالیہ میں اسرائیلی بمباری کو 24 گھنٹے ہوچکے ہیں جس کے دوران شہید ہونے والے فلسطینیوں کی تعداد 706 ہوگئی ہے جب کہ 100 سے زائد زخمی ہیں۔ القدس اور الشفاء ہسپتالوں کو تباہ کر دیا گیا۔
7 اکتوبر سے اب تک غزہ پر اسرائیل کی بمباری میں شہید ہونے والوں کی کل تعداد 5 ہزار 791 ہو گئی ہے جب کہ زخمیوں کی تعداد 16 ہزار سے تجاوز کر گئی ہے۔
اسی طرح مغربی کنارے میں اسرائیلی فوج کی کارروائی میں دو فلسطینی نوجوان شہید ہوگئے۔ مغربی کنارے میں شہید ہونے والے نوجوانوں کی تعداد 10 سے زائد ہو گئی ہے۔
گزشتہ روز اسرائیل نے ایک بار پھر غزہ کے شمالی علاقوں سے انخلاء کا الٹی میٹم دیتے ہوئے کہا تھا کہ جو شہری جنوبی غزہ منتقل نہیں ہوں گے انہیں حماس کا حامی تصور کیا جائے گا۔
اسرائیلی فوج نے الٹی میٹم کے بعد شمالی غزہ میں مقیم فلسطینی شہریوں کو نشانہ بنانے کی دھمکی دی۔