اردو ورلڈ کینیڈا ( ویب نیوز ) ایران کے خلاف اسرائیل کے جوابی حملے کے منصوبے کے حوالے سے اہم ترین خفیہ معلومات منظر عام پر آ گئی ہیں جس کے بعد امریکا نے تحقیقات کا آغاز کر دیا ہے۔ معلومات پر مشتمل دستاویزات 15 اور 16 اکتوبر کی ہیں اور "مڈل ایسٹ اسپیکٹیٹر” نامی ٹیلی گرام اکاؤنٹ پر شائع ہونے کے بعد جمعہ کو آن لائن گردش کرنے لگیں۔امریکی نشریاتی ادارے سی این این کا کہنا ہے کہ معاملے سے جڑے تین افراد نے تحقیقات کی تصدیق کی ہے جب کہ ان میں سے ایک نے دستاویزات کی صداقت کی تصدیق کی ہے۔
ایک امریکی اہلکار نے سی این این کو بتایا کہ یہ لیک انتہائی تشویشناک ہے۔دستاویزات کو "ٹاپ سیکرٹ” کے طور پر نشان زد کیا گیا ہے اور ان پر نشانات ہیں جو یہ بتاتے ہیں کہ انہیں صرف امریکہ اور اس کے 5 اتحادیوں، "فائیو آئیز” یعنی آسٹریلیا، کینیڈا، نیوزی لینڈ اور برطانیہ ہی دیکھ سکتے ہیں۔ان دستاویزات میں ایران کے خلاف ممکنہ حملے کے لیے اسرائیل کی تیاریوں کی تفصیل ہے۔ نیشنل جیوگرافک انٹیلی جنس ایجنسی کی طرف سے مرتب کردہ ایک دستاویز میں کہا گیا ہے کہ اس منصوبے میں ہتھیاروں کی اسرائیل منتقلی بھی شامل ہے۔
ایک اور دستاویز نیشنل سیکیورٹی ایجنسی سے منسوب ہے اور اس میں اسرائیل کی فضائیہ کی مشقوں کا ذکر ہے، جن میں ہوا سے زمین پر مار کرنے والے میزائل بھی شامل ہیں۔ ایک امریکی اہلکار نے سی این این کو بتایا کہ تفتیش اس بات کی جانچ کر رہی ہے کہ پینٹاگون کی مبینہ دستاویزات تک کس کی رسائی تھی۔ سی این این کے مطابق، یہ لیک امریکہ اسرائیل تعلقات کے انتہائی حساس وقت میں سامنے آئی ہے اور اسرائیلیوں کو غصہ دلائے گی۔
