اردو ورلڈ کینیڈا ( ویب نیوز ) سلطنت عُمان میں رمضان المبارک کے آغاز سے متعلق باضابطہ اعلان کر دیا گیا ہے
جس کے مطابق ملک میں پہلا روزہ 19 فروری کو ہو گا۔ عالمی خبر رساں ادارے کے مطابق عُمان کی مرکزی چاند دیکھنے والی کمیٹی "ہلال نیمہ” نے بتایا کہ شعبان کے 29 ویں روز چاند نظر آنے کے امکانات نہ ہونے کے برابر ہیں۔ فلکیاتی مشاہدات سے ظاہر ہوتا ہے کہ اس دن چاند غروبِ آفتاب سے پہلے ہی ڈوب جائے گا، جس کے باعث ملک کے کسی بھی حصے میں ہلال کا بصری طور پر نظر آنا ممکن نہیں ہوگا۔
کمیٹی کے اعلان کے مطابق 18 فروری شعبان کا تیسواں دن ہوگا، جبکہ اس کے بعد بدھ 19 فروری کو یکم رمضان ہو گا اور اسی روز پہلا روزہ رکھا جائے گا۔
حکام کا کہنا ہے کہ نئے ہجری مہینے کے آغاز کا تعین شرعی اصولوں کے ساتھ جدید سائنسی طریقوں کو مدنظر رکھ کر کیا گیا ہے تاکہ روایت اور فلکیات کے درمیان توازن برقرار رکھا جا سکے۔ اس سلسلے میں محکمہ موسمیات کی رپورٹس اور ماہرین فلکیات کی سفارشات کو بھی شامل کیا گیا۔اتھارٹی نے اپنے بیان میں کہا کہ قبل از وقت اعلان کا مقصد عوام کو رمضان المبارک کی تیاری، عبادات کے اہتمام اور روزمرہ امور کی منصوبہ بندی کے لیے مناسب وقت فراہم کرنا ہے۔ توقع کی جا رہی ہے کہ اس اعلان کے بعد ملک بھر میں مساجد، فلاحی ادارے اور شہری رمضان کی آمد کی تیاریاں تیز کر دیں گے۔
