اردوورلڈ کینیڈا ( ویب نیوز )جڑانوالہ میں مساجد سے اعلانات کروا کر اقلیتوں کی عبادت گاہوں پر حملے کیلئے اکسانے والا ملزم گرفتار کر لیا گیا۔
پولیس کا کہنا ہے کہ جڑانوالہ میں آتشزدگی کرنے والوں کے خلاف 2 مقدمات درج کیے گئے ہیں جن میں 37 افراد کو نامزد کیا گیا ہے اور 600 سے زائد نامعلوم افراد کو شامل کیا گیا ہے۔

پولیس کے مطابق ملزمان نے توڑ پھوڑ، گھروں اور گرجا گھروں کو آگ لگائی، مقدمات میں دہشت گردی اور توہین رسالت سمیت 13 سے زائد دفعات شامل ہیں۔
جڑانوالہ میں مشتعل افراد نے مسیحی برادری سے تعلق رکھنے والے 4 چرچ، درجنوں مکانات اور گاڑیاں جلا دیں۔
دوسری جانب پولیس کا کہنا ہے کہ جڑانوالہ کی مسجد میں اعلان کرکے لوگوں کو مشتعل کرنے والے ملزم کو گرفتار کرلیا گیا ہے۔
پولیس کے مطابق ملزم یاسین کو منظر عام پر آنے والی ویڈیو کی مدد سے گرفتار کیا گیا، ویڈیو میں دیکھا جا سکتا ہے کہ ملزم مسجد کے لاؤڈ سپیکر پر لوگوں کو جمع ہونے کا کہہ رہا ہے۔
پولیس کا کہنا ہے کہ ویڈیوز کی مدد سے فسادات میں ملوث مزید مشتبہ افراد کی شناخت اور گرفتاری کی کوششیں جاری ہیں۔