ishtiaq ahmed 
اردوورلڈ کینیڈا( ویب نیوز)صوبہ پنجاب میں چیف منسٹر کلائمیٹ لیڈرشپ ڈویلپمنٹ انٹرن شپ پروگرام شروع ہو گیا ہے۔وزیراعلیٰ مریم نواز شریف نے کہا کہ سموگ کے مستقل حل کے لیے مشترکہ اقدامات کرنا ہوں گے، نوجوان گریجویٹس سموگ فری پنجاب انیشیٹو کے تحت کمیونٹی سروس کی منفرد خدمات سرانجام دیں گے۔
مریم نواز نے کہا کہ گزشتہ 2 سال میں ڈگری مکمل کرنے والے گریجویٹ درخواست دے سکتے ہیں، وزیراعلیٰ پنجاب کلائمیٹ لیڈرشپ ڈویلپمنٹ انٹرن شپ پروگرام کے تحت انٹرنز کو ماہانہ 25 ہزار وظائف د ئیے جائیں گے۔ کلائمیٹ لیڈرشپ ڈویلپمنٹ انٹرنشپ پروگرام کمیونٹی سروس اور ماحولیاتی تحفظ کے لیے ایک پلیٹ فارم مہیا کرتا ہے۔
انہوں نے مزید بتایا کہ کلائمیٹ لیڈرشپ ڈویلپمنٹ انٹرن شپ پروگرام میں 20 جولائی 2024 تک رجسٹریشن کروائی جا سکتی ہے۔ انٹرن شپ مکمل کرنے والے 18 سے 25 سال کے نوجوانوں کو کمیونٹی سروس سرٹیفکیٹ جاری کیا جائے گا۔ کمیونٹی سروس سرٹیفکیٹ محکمہ تحفظ ماحولیات اور پنجاب ہائر ایجوکیشن کمیشن کی طرف سے دیا جائے گا۔
مریم نواز شریف نے عوام سے اپیل کی کہ وہ سموگ کے سنگین مسئلے کے حل کے لیے حکومت کا ساتھ دیں، گاڑیوں اور فیکٹریوں سے دھوئیں کے اخراج کو کم کریں اور زیادہ سے زیادہ پودے لگائیں۔ پلاسٹک کا استعمال کم کیا جائے اور فصل کی باقیات کو جلانے سے گریز کیا جائے۔
وزیراعلیٰ نے کہا کہ آج ہم اپنے ماحول کو صاف رکھنے کی کوشش نہیں کریں گے تو اور کون کرے گا ۔
55
