اردو ورلڈ کینیڈا ( ویب نیوز )جسٹس امین الدین نے سپریم کورٹ میں پنجاب اور کے پی کے انتخابات التوا کیس کی سماعت سے انکار کردیا جس کے بعد پانچ رکنی بنچ ٹوٹ گیا۔
چیف جسٹس پاکستان کی سربراہی میں کیس کی سماعت شروع ہوئی، جسٹس امین الدین نے ریمارکس دیے کہ جسٹس قاضی فائز عیسی کے فیصلے کے تناظر میں کیس سننے سے معذرت کرتے ہیں۔
بنچ میں جسٹس اعجاز الاحسن، جسٹس منیب اختر، جسٹس امین الدین خان اور جسٹس جمال مندوخیل شامل تھے۔
گزشتہ سماعت میں پی ٹی آئی کے وکیل علی ظفر، الیکشن کمیشن کے وکیل سواتی نے اپنے دلائل مکمل کر لیے، اٹارنی جنرل منصور عثمان اعوان آج بھی دلائل جاری رکھیں گے جب کہ نگرا ن حکومتوں اور گورنر کے پی کے کے وکلا بھی دلائل دیں گے۔
پیپلز پارٹی، مسلم لیگ ن، جے یو آئی سمیت دیگر جماعتوں کے وکلا بھی دلائل دیں گے۔
گزشتہ روز وکیل الیکشن کمیشن نے دلائل دیتے ہوئے کہا کہ آرٹیکل 224 کے تحت انتخابات 90 دن میں کرانا ہوتے ہیں، انتخابات کے لیے آئین میں سازگار ماحول کا ہونا بھی ضروری ہے، اور انتخابات کی تاریخ کا اعلان کرکے اس پر عمل درآمد کیا،یکم مارچ کو سپریم کورٹ کا فیصلہ سکیورٹی اور فنڈز کی صورتحال کے پیش نظر الیکشن کی نئی تاریخ 8 اکتوبر دی گئی ہے۔
چیف جسٹس پاکستان نے اپنے ریمارکس میں کہا کہ الیکشن کمیشن کوئی راستہ نہیں نکال سکتا تو ہم ڈھونڈ لیں گے۔