ٹروڈو نے کہا کہ دنیا خواتین، بچوں اور نومولود بچوں کے قتل کی گواہی دے رہی ہے، اسے جلد بند ہونا چاہیے۔ غزہ میں انسانیت کا نقصان اب نظر نہیں آتا، خاص طور پر الشفاء اسپتال کے اردگرد کا منظر دل دہلا دینے والا ہے۔واضح رہے کہ رواں ہفتے غزہ کا یہ سب سے بڑا اسپتال اس لیے موضوع بحث بنا ہوا ہے کہ اسرائیلی فورسز نے اس کے کیمپس کو گھیرے میں لے لیا ہے۔
اگرچہ اسرائیل کا کہنا ہے کہ وہ عملے اور مریضوں کو اسپتال خالی کرنے کی اجازت دینے کے لیے تیار ہے، تاہم فلسطینیوں کا کہنا ہے کہ اسرائیلی فورسز اسپتال خالی کرنے والوں پر فائرنگ کر رہی ہیں۔ اس کے علاوہ انتہائی کمزور مریضوں کو یہاں سے ڈسچارج نہیں کیا جا سکتا۔ ڈاکٹروں کا کہنا ہے کہ سہولت میں ایندھن نہیں بچا اور مریض مرنے لگے ہیں۔
ادھر اسرائیل کا کہنا ہے کہ حماس نے اسپتال کو اپنے جنگجوؤں کی پناہ گاہ بنا رکھا ہے اور حماس نے اسپتال کے نیچے اپنا مرکزی کمانڈ سینٹر بنایا ہے۔ لیکن اسرائیل اس بارے میں کوئی ثبوت پیش نہیں کر سکا۔ حماس اور شفا ہسپتال کے عملے کی جانب سے اسرائیل کے ان الزامات کو جھوٹا قرار دیا جا رہا ہے۔
منگل کو وینکوور میں ایک تقریب کے دوران ٹروڈو نے کہا کہ عام فلسطینی عوام کے مصائب میں اضافہ کرنے سے انصاف نہیں ملے گا۔ جنگ کے بھی کچھ اصول ہوتے ہیں۔ انہوں نے کہا کہ حماس بھی فلسطینی شہریوں کو اپنی ڈھال کے طور پر استعمال کرنا بند کرے اور تمام قیدیوں کو رہا کرے تاکہ تمام کینیڈین اور دیگر شہری غزہ سے نکل سکیں۔
