اردو ورلڈ کینیڈا ( ویب نیوز ) کینیڈا کے وزیر اعظم جسٹن ٹروڈو نے کہا ہے کہ بھارتی حکومت نے یہ سوچ کر غلطی کی کہ وہ یہاں کینیڈین شہریوں کے خلاف جرائم کی حمایت کر سکتی ہے۔جسٹن ٹروڈو نے کہا کہ ہم کینیڈا کی سرزمین پر کینیڈین شہریوں کے قتل میں کسی بھی ملک کے ملوث ہونے کو برداشت نہیں کریں گے۔انہوں نے کہا کہ وہ بھارت کے ساتھ سفارتی محاذ آرائی نہیں چاہتے لیکن بھارتی حکومت کا ردعمل انکاری ہے، معاملے کو الجھا رہا ہے، مجھ پر ذاتی حملہ اور کینیڈین حکومت کی سالمیت کے خلاف ہے۔
واضح رہے کہ کینیڈا نے بھارتی ہائی کمشنر سنجے کمار ورما اور 5 سفارتی اہلکاروں کو ملک بدر کر دیا ہے۔اس سے قبل، ہندوستان نے اپنے ہائی کمشنر اور سفارت کاروں کو کینیڈا سے واپس بلانے کا فیصلہ سفارتی تنازعہ بڑھنے کے بعد کیا تھا۔یہ سفارت کار سکھ علیحدگی پسند ہردیپ سنگھ نگر کے قتل کی کینیڈا کی تحقیقات میں شامل تھے۔
یاد رہے کہ دونوں ممالک کے درمیان کشیدگی گزشتہ سال کینیڈا میں سکھ رہنما ہردیپ سنگھ نجار کے قتل کے بعد شروع ہوئی تھی۔ کینیڈین وزیراعظم نے ہردیپ سنگھ نگر کے قتل کا ذمہ دار بھارتی حکومت کو ٹھہرایا۔بعد ازاں ہندوستان نے کینیڈا کے 41 سفارتی اہلکاروں کو ملک چھوڑنے کو کہا۔
