اردوورلڈکینیڈا( ویب نیوز)بھارت کے دارالحکومت دہلی میں ایک حیران کن واقعہ اس وقت پیش آیا جب افغانستان سے تعلق رکھنے والا 13 سالہ لڑکا ایک مسافر طیارے کے لینڈنگ گیئر میں چھپ کر وہاں پہنچ گیا۔
بھارتی میڈیا کے مطابق یہ واقعہ اتوار کی صبح پیش آیا۔ کابل ایئرپورٹ کے سخت سیکیورٹی والے حصے میں داخل ہونے کے بعد لڑکا افغان ایئرلائن KAM کی پرواز RQ-4401 کے پچھلے لینڈنگ گیئر کمپارٹمنٹ میں چھپ گیا۔ تقریباً دو گھنٹے کے سفر کے بعد پرواز صبح 11 بجے دہلی پہنچی۔
لینڈنگ کے فوراً بعد طیارے کے عملے نے ایئرکرافٹ کے قریب لڑکے کو گھومتے دیکھا اور فوری طور پر ایئرپورٹ سیکیورٹی کو اطلاع دی۔
ابتدائی تحقیقات میں معلوم ہوا کہ لڑکا قندوز کا رہائشی ہے اور اس نے یہ اقدام محض تجسس میں کیا تھا۔ تفتیش کے دوران اس نے بتایا کہ اسے اس بات کا اندازہ نہیں تھا کہ لینڈنگ گیئر کمپارٹمنٹ میں سفر کس قدر خطرناک ہو سکتا ہے، کیونکہ دورانِ پرواز یہ حصہ آکسیجن کی کمی اور شدید سردی کی وجہ سے جان لیوا ثابت ہو سکتا ہے۔
سیکیورٹی فورسز نے لڑکے کو حراست میں لے کر ٹرمینل 3 منتقل کیا جہاں مزید پوچھ گچھ کی گئی۔ بعد ازاں حکام نے اُسے اُسی ایئرلائن کی پرواز کے ذریعے واپس کابل بھیج دیا، جو اتوار دوپہر 12:30 بجے دہلی سے روانہ ہوئی۔
ایئرلائن کی سیکیورٹی ٹیم نے طیارے کے لینڈنگ گیئر کمپارٹمنٹ کا مکمل معائنہ کیا، جہاں سے ایک سرخ اسپیکر بھی ملا جو ممکنہ طور پر لڑکے کا ذاتی سامان تھا۔ طیارے کی مکمل جانچ پڑتال کے بعد اسے محفوظ قرار دے دیا گیا۔
