اردو ورلڈ کینیڈا(ویب نیوز )ٹورنٹو بلیو جیز نے کینساس سٹی رائلز کو 5-8 سے شکست دے کر 2025 کے بیس بال سیزن کے پلے آف میں اپنی جگہ پکی کر لی۔

یہ بلیو جیز کی 2023 کے بعد پہلی پوسٹ سیزن شرکت ہوگی۔ اس سے قبل 2023 میں انہیں وائلڈ کارڈ راؤنڈ میں مینی سوٹا ٹوئنز کے ہاتھوں شکست کا سامنا کرنا پڑا تھا۔ٹورنٹو نے اس مقابلے میں فتح کے ساتھ ہی اپنا ہدف حاصل کر لیا، اگرچہ ٹیم کو پلے آف کے لیے ڈیٹرائٹ ٹائیگرز، بوسٹن ریڈ سوکس اور کلیولینڈ گارڈینز کی شکستوں سے بھی فائدہ ہو سکتا تھا۔ لیکن بلیو جیز نے میدان میں شاندار کارکردگی دکھا کر خود ہی فیصلہ کن کامیابی حاصل کی۔
اس وقت بلیو جیز (90-66) کے پاس امریکن لیگ میں سب سے بہترین ریکارڈ ہے۔ تاہم، امریکن لیگ ایسٹ میں نیویارک یانکیز سے صرف دو میچوں کی برتری برقرار ہے۔ یہ برتری برقرار رکھنا ٹیم کے لیے نہایت اہم ہوگا کیونکہ ڈویژن کراؤن اور امریکن لیگ میں پہلا یا دوسرا نمبر حاصل کرنے کی صورت میں بلیو جیز کو وائلڈ کارڈ راؤنڈ کھیلنے سے استثنیٰ ملے گا اور ڈویژن سیریز میں ہوم فیلڈ ایڈوانٹیج بھی حاصل ہوگا۔ماہرین کا کہنا ہے کہ اگر بلیو جیز اپنی موجودہ فارم برقرار رکھتی ہے تو اس کے پاس نہ صرف ڈویژن کراؤن جیتنے بلکہ ورلڈ سیریز تک رسائی حاصل کرنے کا بھی بہترین موقع موجود ہے۔