گزشتہ روز ضمنی انتخابات کے لیے چیئرمین، وائس چیئرمین اور وارڈ ممبران کی 10 نشستوں پر پولنگ ہوئی جس کے غیر سرکاری اور غیر حتمی نتائج کے مطابق چیئرمین کی 3 نشستوں سمیت 10 میں سے 6 نشستوں پر پیپلز پارٹی کے امیدوار کامیاب قرار پائے۔ .
گزشتہ روز ہونے والے ضمنی انتخابات میں جماعت اسلامی نے دو جبکہ پی ٹی آئی اور آزاد امیدواروں نے ایک ایک نشست پر کامیابی حاصل کی۔
کراچی کے پانچ اضلاع کے ضمنی انتخابات میں پاکستان پیپلز پارٹی نے یوسی 13 سے صدر، ملیر گڈاپ یوسی 7 سے چیئرمین اور ماڑی پور یوسی 3 سے چیئرمین کی تین نشستیں جیت لیں۔
ضلع جنوبی کے صدر یوسی 13 سے پیپلز پارٹی کے مرتضیٰ وہاب نے 3949 ووٹ حاصل کیے جبکہ کیماڑی ماڑی پور یوسی 3 سے پیپلز پارٹی کے سیف اللہ 5466 ووٹ لے کر کامیاب ہوئے۔
ملیر گڈاپ یوسی 7 سے چیئرمین کے لیے پی پی کے امیدوار سلمان عبداللہ مراد اور وائس چیئرمین محمد سلیم میمن نے 9932 ووٹ لے کر اپنے حریفوں کو شکست دی۔
ضلع جنوبی صدر یوسی 12 میں پیپلز پارٹی کے وائس چیئرمین کے امیدوار حامد حسین 3248 ووٹ لے کر آگے تھے۔
دوسری جانب ضلع وسطی ناظم آباد یوسی 5 کے وارڈ 3 اور ڈسٹرکٹ ایسٹ جناح ٹاؤن یوسی 6 کے وارڈ 4 میں جماعت اسلامی نے کامیابی حاصل کی، یوسی 2 وارڈ 3 سے ملیر غازی داؤد بروہی اور آزاد امیدوار محمد عمر نے کامیابی حاصل کی جبکہ وائس چیئرمین پاکستان تحریک انصاف ضلع جنوبی کے صدر یوسی 6 کی نشست امیدوار منصور احمد نے جیت لی۔
ضمنی بلدیاتی انتخابات میں کامیابی کے بعد پیپلز پارٹی کراچی کے صدر سعید غنی نے میڈیا سے گفتگو کرتے ہوئے کہا کہ پیپلز پارٹی نے کراچی سمیت سندھ بھر میں ضمنی انتخابات میں کلین سویپ کیا ہے، اس کامیابی نے ثابت کر دیا ہے کہ ملک کی واحد عوامی سیاسی جماعت ہے۔
سعید غنی نے کہا کہ جون میں ہونے والے بلدیاتی انتخابات کے مقابلے میں اس ضمنی انتخاب میں عوام نے پیپلز پارٹی کو زیادہ ووٹ دیا ہے، اب کراچی کی دعویدار جماعت اسلامی کو یقین ہو جانا چاہیے کہ پیپلز پارٹی عوام کی جماعت ہے۔
