سیالکوٹ میں میڈیا سے گفتگو کرتے ہوئے خواجہ آصف نے کہا کہ شہباز شریف سے متعلق خبریں گردش کرتی رہیں کہ وہ 2 دن رہے اور واپس چلے گئے، کچھ باتوں پر ٹیلی فون پر مشاورت نہیں ہو سکتی، کچھ باتیں چھپ کر کی جاتی ہیں۔
یاد رہے کہ میڈیا میں یہ خبریں گردش کر رہی تھیں کہ شہباز شریف نے گوجرانوالہ میں ایک اہم شخص سے ملاقات کی اور پھر اگلے روز وہ پیغام لے کر لندن روانہ ہو گئے۔
خواجہ آصف نے کہا کہ شہباز شریف کے اسٹیبلشمنٹ کے پیغامات میں کوئی صداقت نہیں، شہباز شریف نے الیکشن اور دیگر سیاسی معاملات کے حوالے سے بھی نواز شریف سے مشاورت کی۔
سابق وزیر دفاع نے کہا کہ نواز شریف 21 اکتوبر کو واپس آئیں گے، نیت صاف ہے، نواز شریف کی واپسی کی بھرپور تیاریاں کر رہے ہیں۔
انہوں نے کہا کہ نواز شریف کی وطن واپسی پر گرفتاری پر کوئی بات نہیں کر سکتا، ہمارے سابق وزیر قانون نذیر تارڑ اس معاملے کو دیکھ رہے ہیں۔