اردوورلڈ کینیڈا ( ویب نیوز)وزیر دفاع خواجہ محمد آصف نے کہا ہے کہ الیکشن کی تیاریاں شروع کر دی ہیں، ایک ماہ میں مدت پوری کر کے اسمبلی تحلیل کر دی جائے گی۔
ورکرز کنونشن سے خطاب کرتے ہوئے خواجہ محمد آصف نے کہا کہ پی ڈی ایم کے ساتھ جوائنٹ یا سیٹ ایڈجسٹمنٹ کا فیصلہ اسمبلی تحلیل ہونے کے بعد کیا جائے گا۔
وزیر دفاع نے اپنے خطاب میں کہا کہ اسمبلیاں تحلیل ہونے کے بعد 5 سال بعد قوم کو ووٹ کا حق استعمال کرنے کا موقع ملے گا۔
وزیر دفاع نے کہا کہ ہم نے مشکل حالات میں حکومت سنبھالی، ہمارے پاس حکومت سنبھالتے ہی اسمبلیاں تحلیل کرنے کا انتخاب تھا، اگر ہم اسمبلی تحلیل کردیتے تو آئی ایم ایف اور دیگر امداد کا بہاؤ رک جاتا اور ملک ڈیفالٹ ہو جاتا مدت پوری کرنے کے بعد اسمبلی تحلیل ہو جائے گی۔
خواجہ آصف نے کہا کہ ہزاروں اربوں روپے کی بجلی، گیس اور ٹیکس چوری ہوتے ہیں۔ اگر یہ سلسلہ جاری رہا تو ملک معاشی طور پر تباہی کا شکار رہے گا۔
انہوں نے کہا کہ 9 مئی ملکی تاریخ کا سیاہ دن تھا، چیئرمین پی ٹی آئی کے غلط سیاسی فیصلوں کی وجہ سے ان کی حکومت گر گئی، اس نے ریاست کو چیلنج کیا، دیکھیں اس کے ٹارگٹ کیا ہیں، اس شخص نے دفاعی ضمانت دینے والے ادارے پر حملہ کیا۔ .
خواجہ آصف کا مزید کہنا تھا کہ سیاستدانوں نے بہت غلطیاں کی ہیں، اسٹیبلشمنٹ سے بھی غلطیاں ہوئی ہیں، لیکن میں نے کسی پارٹی کے کسی کارکن کو مفرور نہیں دیکھا، جس طرح ان کے رہنما فرار ہوئے ہیں۔
