اردو ورلڈ کینیڈا ( ویب نیوز )وزیر دفاع خواجہ آصف نے کہا ہے کہ فوجی تنصیبات پر حملہ کرنے والوں کے ساتھ قانون کے مطابق پاکستان کے دشمنوں جیسا سلوک کیا جائے گا۔
سیالکوٹ میں میڈیا سے گفتگو کرتے ہوئے خواجہ آصف نے کہا کہ ہم کسی کے بنیادی حقوق نہیں چھین رہے، قانون کو سیاسی مقاصد کے لیے استعمال نہیں ہونے دیں گے، مجھے کسی کی حب الوطنی پر شک نہیں لیکن 9 مئی کو فوجی تنصیبات پر حملہ کرنا جرم ہے۔ عوام کی نیت اور اس مٹی سے تعلق پر سوالیہ نشان ہے
انہوں نے کہا کہ پی ٹی آئی کی قیادت اداروں کو نشانہ بنا رہی ہے، عمران خان دوسرے ممالک کو بھی ملوث کر رہے ہیں، پاک فوج کی قربانیاں ہماری تاریخ کا روشن حصہ ہیں، پاکستانی قوم افواج پاکستان سے محبت کرتی ہے، وقت آگیا ہے کہ پوری قوم متحد ہو کر ان کا شکریہ ادا کرے۔
سینئر لیگی رہنما کا کہنا تھا کہ ایک شخص نے صرف اقتدار کے لیے بیس پر حملہ کیا، ایئربیس پر حملہ دشمن نے کیا، کوئی محب وطن قومی اثاثوں پر حملہ کر سکتا ہے ؟، سیاستدان اقتدار حاصل کرتے رہتے ہیں
خواجہ آصف نے مزید کہا کہ قانون کے مطابق بنیادی حقوق کا تحفظ کیا جا رہا ہے، حملے میں ملوث افراد کے خلاف مقدمات درج کیے جا رہے ہیں، قانون کو سیاسی مقاصد کے لیے استعمال نہیں کیا جائے گا، فوجی تنصیبات پر حملہ کرنے والوں کے ساتھ وہی سلوک کیا گیا جس کے وہ مستحق ہیں
اس سے قبل سیالکوٹ میں پاک فوج سے اظہار یکجہتی کے لیے ریلی نکالی گئی۔ ریلی میں وزیر دفاع خواجہ آصف نے خصوصی شرکت کی۔
