اردوورلڈ کینیڈا( ویب نیوز)خیبرپختونخوا اسمبلی میں سینیٹ کی 11 نشستوں کے لیے کل پولنگ ہوئی، جس میں پاکستان تحریک انصاف (پی ٹی آئی) نے چھ اور اپوزیشن اتحاد نے پانچ نشستیں جیت لیں۔ نتائج کے مطابق پی ٹی آئی کے مراد سعید، فیصل جاوید، مرزا آفریدی، نور الحق قادری جنرل جماعت کی نشستوں پر کامیاب ہوئے، جبکہ اپوزیشن کے مولانا عطاء الحق درویش، نیاز احمد، اور طلحہ محمود تین نشستیں لے گئے۔

مراد سعید سب سے زیادہ ووٹ لینے والے امیدوار بنے، انہیں 26 ووٹ ملے، جب کہ فیصل جاوید کو 22، مرزا آفریدی کو 21، اور نور الحق قادری کو 21 ووٹ ملے۔
خواتین کی مخصوص دو نشستوں پر پی ٹی آئی کی روبینہ ناز اور پیپلز پارٹی کی روبینہ خالد کامیاب ہوئیں، جنہوں نے بالترتیب 89 اور 52 ووٹ حاصل کیے۔
ٹیکنوکریٹ کی دو نشستوں میں پی ٹی آئی کے اعظم سواتی اور جے یو آئی (ف) کے دلاور خان کامیاب قرار دیے گئے، جنہوں نے بالترتیب 89 اور 54 ووٹ پائے ۔
یہ انتخابات ایک پہلے سے طے شدہ "سیٹ شیئرنگ” معاہدے کے تحت ہوئے، جس کے مطابق پی ٹی آئی کے لیے چھ اور اپوزیشن اتحاد کے لیے پانچ نشستیں مختص تھیں۔ اس فارمولے سے ہارس ٹریڈنگ کے امکانات کو کم کیا گیا ۔
کل 145 اراکین نے حصہ لیا، پولنگ صبح 11 بجے شروع ہو کر شام 5:30 تک جاری رہی۔ اس دوران سخت سیکورٹی کے انتظامات کیے گئے اور پولنگ بوتھز لگائے گئے تاکہ ووٹنگ شفاف طور پر ہو سکیں ۔