اردو ورلڈ کینیڈا ( ویب نیوز ) دنیا کی بلند ترین عمارتوں کے بارے میں سوچتے ہیں تو سب سے پہلے جو تصویر ذہن میں آتی ہے وہ دبئی میں واقع برج خلیفہ ہے۔

اور کیوں نہ ہو، دنیا کی بلند ترین عمارت کا اعزاز اس وقت برج الخلیفہ کے پاس ہے۔لیکن آنے والے سالوں میں دنیا کی بلند ترین عمارت کا اعزاز کسی اور عرب ملک کو منتقل ہو سکتا ہے۔

کویت دنیا کی بلند ترین عمارت بنانے کا ارادہ رکھتا ہے۔کویت کے نئے شہر مدینہ الحریر میں برج مبارک الکبیر کے نام سے دنیا کی بلند ترین عمارت کی تعمیر کا منصوبہ بنایا گیا ہے۔اس شہر کی تعمیر 2023 میں مکمل ہونے کی امید ہے۔

1,001 میٹر اونچی عمارت کی تعمیر پر اربوں ڈالر لاگت آئے گی اور اسے مکمل ہونے میں 25 سال لگ سکتے ہیں۔واضح رہے کہ برج الخلیفہ کی عمارت 828 میٹر بلند ہے۔ایک کلومیٹر اونچی اس عمارت کا ڈیزائن ہسپانوی ماہر تعمیرات سینٹیاگو کالاتراوا تیار کریں گے۔

اطلاعات کے مطابق اس عمارت میں 234 منزلیں ہوں گی اور اس میں 7000 افراد کے بیٹھنے کی گنجائش ہوگی۔عمارت میں دفاتر، اپارٹمنٹس اور ہوٹل سمیت مختلف سہولیات ہوں گی۔واضح رہے کہ مدینہ الحریر 250 مربع کلومیٹر کے رقبے پر پھیلا ہوا شہر ہو گا جہاں 70 لاکھ افراد قیام کر سکیں گے۔