اردو ورلڈ کینیڈا ( ویب نیوز )پاکستان سمیت دنیا بھر میں مزدوروں کی قربانیوں اور ان کے حقوق کو اجاگر کرنے کے لیے عالمی یوم مزدور منایا جا رہا ہے اور اس سلسلے میں تمام چھوٹے بڑے شہروں میں ریلیاں نکالی جائیں گی
مزدوروں کے لیے منائے جانے والے دن پر بھی مزدور اس دن کی اہمیت کو جانے بغیر اپنے بچوں کی روٹی کے لیے کام کر رہا ہے۔
یوم مزدور پر گوگل کا ڈوڈل بھی تبدیل ہوا جب کہ آج ملک بھر میں عام تعطیل ہے۔
یوم مزدور کیا ہے؟
یکم مئی 1886 کو امریکی شہر شکاگو کے محنت کش سرمایہ داروں اور صنعت کاروں کے استحصال کے خلاف سڑکوں پر نکلے لیکن پولیس نے جلوس پر فائرنگ کر دی جس سے سینکڑوں مزدور ہلاک اور زخمی ہو گئے جب کہ درجنوں اپنے حقوق کے لیے اٹھ کھڑے ہوئے۔
عالمی یوم مزدور یکم مئی کو دنیا کے بیشتر ممالک میں شکاگو کے محنت کشوں سے اظہار یکجہتی کے لیے منایا جاتا ہے۔ یکم مئی ہر سال مزدوروں کے معاشی حالات کو بدلنے کے لیے کوششیں کرنے کے عہد کے ساتھ منایا جاتا ہے
پاکستان میں قومی سطح پر یوم مزدور منانے کا آغاز 1973 میں ذوالفقار علی بھٹو کے دور حکومت میں ہوا۔
پاکستان میں مزدوروں کی حالت زار
مزدور رہنماؤں کا کہنا ہے کہ پرائیویٹ سیکٹر میں کام کرنے والے لاکھوں مزدوروں کو اب بھی صحت کی سہولیات سمیت سماجی تحفظ کی سہولت میسر نہیں اور حکومت کی جانب سے کم از کم اجرت کے اعلان پر عمل درآمد نہیں ہوا۔
ان کا مطالبہ ہے کہ قومی اور صوبائی اسمبلیوں سمیت سینیٹ میں کارکنوں کی نمائندگی کے بغیر کارکنوں کے مفاد میں قانون سازی نہیں ہو سکتی اور تمام سیاسی جماعتیں کارکنوں کے لیے مخصوص نشستیں مختص کریں۔
