اردوورلڈکینیڈا( ویب نیوز)لاہور ہائیکورٹ نے پی ٹی آئی رہنما حسان نیازی کی ملٹری کورٹ کی کارروائی کے خلاف دائر درخواست 16 ستمبر کو سماعت کے لیے مقرر کر دی۔ سماعت جسٹس سید شہباز علی رضوی کی سربراہی میں دو رکنی بینچ کرے گا۔
عدالت نے رجسٹرار آفس کے اعتراضات پر وفاقی حکومت کو نوٹس جاری کر رکھا ہے۔ رجسٹرار آفس کے مطابق درخواست میں کمانڈنگ آفیسر کے مصدقہ آرڈر کی کاپی شامل نہیں اور درخواست گزار نے متعلقہ فورم سے بھی رجوع نہیں کیا۔
گزشتہ روز اسی کیس میں عدالت نے حسان نیازی کی ملٹری کسٹڈی اور کورٹ مارشل کارروائی کے خلاف وفاقی حکومت سے جواب طلب کیا تھا۔ سماعت دو رکنی بینچ نے کی تھی جس میں جسٹس سید شہباز علی رضوی اور جسٹس طارق محمود باجوہ شامل تھے۔
سینئر قانون دان فیصل صدیقی کے ذریعے دائر درخواست میں مؤقف اپنایا گیا ہے کہ 9 مئی واقعے میں گرفتاری کے بعد حسان نیازی کو کسی سویلین عدالت میں پیش نہیں کیا گیا بلکہ غیر قانونی طور پر فوج کے حوالے کیا گیا۔ درخواست میں کمانڈنگ آفیسر کا 17 اگست 2023 کا نوٹیفکیشن کالعدم قرار دینے اور ملٹری کسٹڈی سمیت تمام کارروائیاں ختم کرنے کی استدعا کی گئی ہے۔
درخواست گزار نے مزید مطالبہ کیا ہے کہ انہیں جیل سے رہا کرنے یا انسداد دہشت گردی عدالت میں پیش کرنے کا حکم جاری کیا جائے۔
