اردوورلڈ کینیڈا ( ویب نیوز )چیئرمین سینیٹ صادق سنجرانی نے کہا ہے کہ انتخابات وقت پر ہوں گے اور ہوں گے۔چیئرمین سینیٹ صادق سنجرانی نے کراچی میں مزار قائد پر حاضری دی اور فاتحہ خوانی کی۔ اس موقع پر چیئرمین سینیٹ صادق سنجرانی کو مسلح افواج کی جانب سے سلامی دی گئی جب کہ چیئرمین سینیٹ نے مزار پر پھول چڑھائے اور مہمانوں کی کتاب میں تبصرے لکھے۔

مزار قائد پر حاضری کے بعد میڈیا سے گفتگو کرتے ہوئے صادق سنجرانی نے کہا کہ بلوچستان کے سینیٹرز بلوچستان کے حق میں آواز بلند کررہے ہیں اور بلوچستان کے عوام کو نگران وزیراعظم سے امید کی کرن نظر آئی ہے تاہم اس کے لیے بہت زیادہ وسائل کی ضرورت ہے۔
ایک سوال کے جواب میں چیئرمین سینیٹ نے کہا کہ گزشتہ حکومت میں اتحادی جماعتوں نے مردم شماری کا نوٹیفکیشن کیا، سب جانتے تھے کہ حلقہ بندیاں ہوں گی۔
چیئرمین سینیٹ نے کہا کہ یقین رکھیں الیکشن وقت پر ہوں گے ۔ حلقہ بندیاں مکمل ہوتے ہی الیکشن کمیشن انتخابات کی تاریخ دے گا۔ قوم مطمئن رہے کہ انتخابات وقت پر ہوں گے۔
صدر پاکستان سے متعلق سوال پر صادق سنجرانی نے کہا کہ صدر مملکت کی مدت 9 ستمبر کو ختم ہو رہی ہے، نئے صدر کے انتخاب تک صدر مملکت اپنے عہدے پر فائز رہیں گے۔