51
اردوورلڈ کینیڈا ( ویب نیوز)ملائیشیا کی باٹک ایئرلائن نے کراچی کے لیے بھی براہ راست پروازوں کا اعلان کیا ہے۔باٹک ایئر لائن نے پاکستان میں اپنا نیٹ ورک بڑھانے کا اعلان کیا ہے، اس سلسلے میں باٹک ایئر کراچی اور کوالالمپور کے درمیان ہفتہ وار تین پروازیں چلائے گی۔
ایئر لائن اگلے ماہ 31 اکتوبر سے کوالالمپور اور کراچی کے درمیان براہ راست پروازیں شروع کرے گی۔
ایئرلائن کے اعلامیے کے مطابق کوالالمپور سے باٹک ایئر کی پرواز او ڈی 135 ہر منگل، جمعرات اور ہفتہ کی رات 8 بجے کراچی پہنچے گی، اسی تین دن کراچی سے پرواز او ڈی 136 رات 9 بجے کوالالمپور کے لیے روانہ ہوگی۔
اس کے علاوہ ایئر لائن نے طلباء اور گروپ مسافروں کے لیے خصوصی پرکشش رعایت کا بھی اعلان کیا ہے۔
واضح رہے کہ باٹک ایئرلائن پہلے ہی لاہور اور کوالالمپور کے درمیان روزانہ نان سٹاپ براہ راست پروازیں چلا رہی ہے۔
