اردو ورلڈ کینیڈا ( ویب نیوز ) مانیٹوبا ہیلتھ نے گزشتہ ماہ منعقد ہونے والے زرعی میلے "ایگ ڈیز” میں شرکت کرنے والے
افراد کو خسرہ (Measles) کی ممکنہ نمائش کے پیش نظر اپنی صحت پر کڑی نظر رکھنے کی ہدایت جاری کر دی ہے۔صحت حکام کے مطابق اس ایونٹ کے دوران وائرس سے متاثر ہونے کا شبہ ہے، جس کے باعث ان تمام افراد کو احتیاط برتنے کا مشورہ دیا گیا ہے جو 20، 21 اور 22 جنوری کو برینڈن کے کی اسٹون سینٹر میں صبح 9 بجے سے شام 7 بجے کے درمیان موجود تھے۔ حکام نے تاریخ کے مطابق نگرانی کی مدت بھی مقرر کی ہے؛ 20 جنوری کے شرکا کو بدھ تک، 21 جنوری والوں کو جمعرات تک جبکہ 22 جنوری کے شرکا کو جمعہ تک علامات پر نظر رکھنے کی ہدایت دی گئی ہے۔
اسی طرح "ایگریکلچر اِن دی کلاس روم” پروگرام میں 20 سے 22 جنوری کے دوران صبح 9:30 سے شام 5 بجے تک شرکت کرنے والوں کو بھی رواں ہفتے کے اختتام تک خود کو مانیٹر کرنے کا کہا گیا ہے۔
مانیٹوبا ہیلتھ نے ونکلر شہر میں چند مقامات کے لیے بھی ایکسپوژر نوٹس جاری کیے ہیں۔ ان میں یکم فروری کو صبح 9:30 سے دوپہر 3:30 بجے تک "اسٹیکڈ پین کیک اینڈ بریک فاسٹ ہاؤس”، 2 فروری کو صبح 10:30 سے دوپہر 1 بجے تک باؤنڈری ٹریلز ہیلتھ سینٹر کے پبلک ہیلتھ آفس، اور 3 فروری کی شام 7 بجے سے اگلے روز 1:10 بجے تک اسی ہیلتھ سینٹر کے ایمرجنسی ڈیپارٹمنٹ کا دورہ کرنے والے افراد شامل ہیں۔
حکام نے ہدایت کی ہے کہ جن افراد کو خدشہ ہو کہ وہ وائرس کے سامنے آئے ہیں، وہ فوری طور پر اپنی خسرہ ویکسینیشن کی صورتحال چیک کریں اور اسے اپ ڈیٹ کرائیں۔ خاص طور پر 1970 یا اس کے بعد پیدا ہونے والے وہ افراد جنہیں ویکسین نہیں لگی یا پہلے کبھی خسرہ نہیں ہوا، انہیں پانچویں دن سے لے کر اکیسویں دن تک دوسروں سے میل جول محدود رکھنے کا مشورہ دیا گیا ہے، خصوصاً کمزور مدافعتی نظام رکھنے والے افراد سے۔ماہرین کے مطابق خسرہ کی ابتدائی علامات میں بخار، ناک بہنا، کھانسی، غنودگی، چڑچڑاپن اور آنکھوں کی سرخی شامل ہیں، جبکہ منہ یا گلے کے اندر چھوٹے سفید دھبے بھی ظاہر ہو سکتے ہیں۔ چند دن بعد چہرے سے شروع ہونے والے سرخ دھبوں پر مشتمل خارش پورے جسم میں پھیل جاتی ہے۔ یہ علامات عموماً وائرس سے متاثر ہونے کے 7 سے 21 دن کے اندر ظاہر ہوتی ہیں۔صحت حکام نے تاکید کی ہے کہ اگر کسی میں علامات ظاہر ہوں تو وہ گھر میں آئسولیشن اختیار کرے، فوری طور پر اپنے ہیلتھ کیئر فراہم کنندہ سے رابطہ کرے اور ممکنہ ایکسپوژر سے آگاہ کرے۔ مانیٹوبا ہیلتھ کے مطابق خسرہ ایک انتہائی متعدی مرض ہے جو کھانسی یا چھینک کے دوران ہوا میں پھیلنے والے قطروں کے ذریعے دوسروں تک منتقل ہوتا ہے۔
