اردوورلڈکینیڈا( ویب نیوز)فیلڈ مارشل جنرل سید عاصم منیر نے کہا ہے کہ نشانہ بازی میں مہارت فوجی تربیت کا بنیادی حصہ ہونی چاہیے۔ پاک فوج کے شعبہ تعلقات عامہ کے مطابق یہ بیان 45ویں پاکستان آرمی رائفل ایسوسی ایشن سینٹرل میٹ کی اختتامی تقریب میں دیا گیا، جو جہلم میں منعقد ہوئی۔ فیلڈ مارشل عاصم منیر نے تقریب میں مہمان خصوصی کے طور پر شرکت کی۔
اس مقابلے میں پاک فوج، فضائیہ، بحریہ، سول آرمڈ فورسز اور صوبائی ٹیموں نے بھرپور حصہ لیا اور دو ہزار سے زائد شوٹرز نے حصہ لیا۔ پاک فوج نے تیسری انٹر سروسز کامبیٹ شوٹنگ چیمپئن شپ 2025 جیت لی اور تمام چار انٹر سروسز میچز میں کامیابی حاصل کی۔ پنجاب رجمنٹ نے یونٹ فائرنگ پروفیشنسی میچ گروپ-ون میں پہلی پوزیشن حاصل کی اور سپاہی محمد عرفان ماسٹر ایٹ آرمز قرار پائے۔ آرمی مارکس مین شپ یونٹ کے نائب صوبیدار عمر فاروق نے آرمی ہنڈرڈ رائفل میچ ٹرافی جیت لی۔
اس موقع پر آرمی چیف نے شرکاء کی بہترین کارکردگی کو سراہا اور کہا کہ شوٹنگ میں مہارت فوجیوں کی تربیت کا لازمی جزو ہے۔ علاوہ ازیں، جنرل عاصم منیر نے ملٹری کالج جہلم کی سو سالہ تقریبات میں بھی شرکت کی، سینٹینری یادگار اور کالج میوزیم کا افتتاح کیا اور کالج کی ایک صدی پر محیط خدمات کو خراجِ تحسین پیش کیا۔
آرمی چیف نے کہا کہ ملٹری کالج جہلم نے قیادت، نظم و ضبط اور حب الوطنی کو فروغ دیا۔ انہوں نے یادگارِ شہداء پر پھول چڑھائے اور قبل ازیں ان کی آمد پر کور کمانڈر راولپنڈی اور آئی جی ٹریننگ اینڈ ایویلیوایشن نے ان کا استقبال کیا۔
