اردوورلڈکینیڈا( ویب نیوز)وزیراعلیٰ پنجاب مریم نواز شریف نے کہا ہے کہ عوام کی خدمت اور ترقیاتی منصوبوں کے عمل کو مزید تیز رفتاری کے ساتھ آگے بڑھایا جائے گا۔ ان کا کہنا تھا کہ صوبے کے پسماندہ اور چھوٹے اضلاع میں بھی بڑے ترقیاتی منصوبوں کا آغاز کیا جا رہا ہے تاکہ ہر شہری کو سہولیات اور ترقیاتی فوائد میسر آئیں۔
یہ بات انہوں نے میانوالی کے ارکان قومی و صوبائی اسمبلی کے وفد سے ملاقات کے دوران کہی۔ ملاقات میں علی حیدر نور خان، عبید اللہ خان شادی خیل، امانت اللہ خان شادی خیل، عدیل عبد اللہ خان رخڑی، ملک فیروز جوئیہ اور ملک سجاد خان بھچڑ سمیت دیگر ارکان بھی موجود تھے۔ اس موقع پر ملکی سیاسی صورتحال، پنجاب میں جاری ترقیاتی منصوبے اور امن و امان کی صورتحال پر تفصیلی تبادلہ خیال ہوا۔
وفد نے وزیراعلیٰ مریم نواز شریف کو اعزازیہ کارڈ برائے امام مسجد دینے پر خراج تحسین پیش کیا اور صوبے کے سرکاری ہسپتالوں میں مفت ادویات کی فراہمی کے اقدامات کو سراہا۔ وزیراعلیٰ نے کہا کہ سرگودھا کارڈیالوجی کے منصوبے سے ضلع میانوالی کے امراض قلب کے مریض بھی مستفید ہو سکیں گے، جس سے صحت کی سہولیات کا دائرہ مزید وسیع ہوگا۔
یہ بھی پڑھیں :مریم نواز نے ہر ضلع میں اسٹروک مینجمنٹ سینٹرز کے قیام کی منظوری دے دی
مریم نواز شریف نے مزید کہا کہ “ستھرا پنجاب پروگرام” کو دنیا کا سب سے بڑا ویسٹ مینجمنٹ پروگرام بنایا جا رہا ہے، جس کے ذریعے شہریوں کے لیے صاف ستھرا اور ماحول دوست پنجاب یقینی بنایا جائے گا۔ انہوں نے واضح کیا کہ عوام کی خدمت کے سفر میں پسماندہ اور دور دراز علاقوں کو نظر انداز نہیں کیا جا رہا، اور ہر منصوبہ شفافیت اور عوامی فلاح کے اصولوں کے مطابق مکمل کیا جا رہا ہے۔
وفد نے میانوالی میں پہلی پبلک ٹرانسپورٹ کے طور پر الیکٹروبس کے تحفے پر وزیراعلیٰ مریم نواز شریف کا شکریہ ادا کیا۔ ارکان اسمبلی نے کہا کہ میانوالی کے عوام کے لیے یہ الیکٹروبس کسی معجزے سے کم نہیں، اور اس کے ذریعے شہری نقل و حمل کے مسائل میں نمایاں کمی آئے گی۔ اس کے علاوہ میانوالی میں بیوٹیفکیشن اور ستھرا پنجاب پراجیکٹس سے شہر کی خوبصورتی میں واضح اضافہ ہوا ہے، جسے عوام بھی سراہ رہے ہیں۔
وزیراعلیٰ نے ملاقات کے اختتام پر یقین دلایا کہ صوبے کے ہر ضلع میں ترقیاتی منصوبے جاری رہیں گے اور عوام کو روزمرہ کی زندگی میں سہولتیں فراہم کرنے کے لیے ہر ممکن اقدامات کیے جائیں گے۔ انہوں نے کہا کہ حکومت عوام کی خدمت کو اپنی اولین ترجیح بنائے ہوئے ہے اور یہ عمل مستقل بنیادوں پر جاری رہے گا۔
