اردو ورلڈ کینیڈا ( ویب نیوز )مسلم لیگ ن کی چیف آرگنائزر مریم نواز کی وزیراعظم شہباز شریف سے ملاقات کی اندرونی کہانی سامنے آگئی۔
پارٹی ذرائع کے مطابق مریم نواز نے ماڈل ٹائون میں پارٹی صدر شہباز شریف سے ملاقات کی، ملاقات میں پارٹی کو منظم کرنے اور ملک بھر میں ورکرز کنونشنز کے انعقاد پر مشاورت کی گئی۔
پارٹی ذرائع کا کہنا ہے کہ دونوں رہنما ئوں کے درمیان ہونے والی ملاقات میں سابق وزیراعظم شاہد خاقان عباسی کے استعفے کا معاملہ بھی زیر بحث آیا۔
شہباز شریف اور مریم نواز نے شاہد خاقان عباسی کے تحفظات دور کرنے پر اتفاق کر لیا،مریم نواز کو شاہد خاقان عباسی سے جلد ملاقات کرنے کی ہدایت کی گئی ہے۔
اس حوالے سے مریم نواز کا کہنا تھا کہ سابق وزیراعظم شاہد خاقان نواز شریف کے دیرینہ ساتھی ہیں۔
پارٹی ذرائع نے بتایا ہے کہ ملاقات میں پنجاب اور خیبرپختونخوا میں ممکنہ انتخابات کے معاملے پر تفصیلی بات چیت ہوئی، شہباز شریف جلد لیگی کارکنوں کو انتخابات کے حوالے سے پیغام جاری کریں گے۔
وزیراعظم شہباز شریف نے کہا کہ انتخابات اپنے مقررہ وقت پر ہونے چاہئیں، مسلم لیگ ن الیکشن کمیشن کی جانب سے مقرر کردہ تاریخ پر بھرپور تیاری کے ساتھ الیکشن میں حصہ لے گی۔
ذرائع کا مزید کہنا ہے کہ وزیراعظم شہباز شریف اور مریم نواز کے درمیان ملاقات میں مہنگائی کی لہر پر بھی بات چیت ہوئی۔
اس سے قبل جمعیت علمائے اسلام (ف) کے سربراہ مولانا فضل الرحمان نے ماڈل ٹا ئون میں وزیراعظم شہباز شریف سے ملاقات کی، ملاقات میں ملک کی مجموعی سیاسی صورتحال اور باہمی دلچسپی کے دیگر امور پر تبادلہ خیال کیا گیا۔
