غیر ملکی خبر رساں ادارے کے مطابق پیرس میں چاقو اور ہتھوڑے سے حملہ کرنے والے ملزم کی تاریخ پیدائش 1997 ہے، جسے گرفتار کر لیا گیا ہے، حملہ آور کا نام آرمنڈ آر ہے۔فرانسیسی وزارت داخلہ کے مطابق، مشتبہ شخص، جسے 2016 میں ایک اور حملے کی منصوبہ بندی کے الزام میں پہلے ہی چار سال قید کی سزا سنائی جا چکی تھی، ایک شدت پسند تھا اور اسے مسلسل نگرانی میں رہنا چاہیے تھا۔
فرانس کے وزیر داخلہ کا کہنا تھا کہ ملزم نفسیاتی مریض تھا، اسے غزہ جنگ میں فلسطینیوں کی ہلاکت پر دکھ ہوا۔اس حوالے سے فرانسیسی وزیراعظم کا کہنا ہے کہ فرانس دہشت گردوں کے سامنے ہتھیار نہیں ڈالے گا جب کہ میڈیا رپورٹس میں کہا گیا ہے کہ انسداد دہشت گردی کے پراسیکیوٹر حملے کی تحقیقات کریں گے۔
واضح رہے کہ غزہ میں حماس اور اسرائیل کے درمیان جاری لڑائی کے دوران عارضی جنگ بندی ختم ہونے کے بعد اسرائیلی فوج نے 400 سے زائد حملے کیے اور 300 سے زائد فلسطینیوں کو شہید کیا۔7 اکتوبر سے جاری اسرائیلی حملوں میں غزہ میں 60 فیصد مکانات اور رہائشی یونٹ تباہ ہو چکے ہیں۔