اردو ورلڈ کینیڈا ( ویب نیوز ) میکسیکو کی وزارتِ دفاع نے تصدیق کی ہے کہ مغربی ریاست جالسکو میں
سکیورٹی فورسز کے ایک بڑے فوجی آپریشن کے دوران ملک کے بدنام زمانہ منشیات فروش کارٹیل کے سربراہ نیمیسیو اوسیگوئرا المعروف “ایل مینچو” ہلاک ہو گیا۔ حکام کے مطابق فائرنگ کے شدید تبادلے میں زخمی ہونے کے بعد اسے میکسیکو سٹی منتقل کیا جا رہا تھا تاہم وہ زخموں کی تاب نہ لاتے ہوئے راستے میں دم توڑ گیا۔
ایل مینچو طاقتور جرائم پیشہ تنظیم (سی جے این جی) کا سربراہ تھا، جس نے گزشتہ ایک دہائی کے دوران عالمی سطح پر منشیات اسمگلنگ، اسلحہ کی غیر قانونی ترسیل اور اغوا برائے تاوان جیسے سنگین جرائم کے ذریعے اپنی جڑیں مضبوط کیں۔ اس کا گروہ امریکا اور لاطینی امریکا کے کئی ممالک تک منشیات کی سپلائی میں ملوث رہا۔
سی جے این جی کا بڑا حریف Sinaloa Cartel ہے، جس کی قیادت ماضی میں گرفتار ڈرگ لارڈ جواکین گزمان المعروف “ایل چاپو” کر چکا ہے۔ دونوں کارٹیلز کے درمیان علاقائی کنٹرول اور اسمگلنگ روٹس پر قبضے کے لیے خونی جھڑپیں ہوتی رہی ہیں۔
ملک بھر میں ہنگامے
کارروائی کی خبر سامنے آتے ہی جالسکو سمیت مختلف ریاستوں میں پرتشدد ہنگامے پھوٹ پڑے۔ مسلح افراد نے کئی مقامات پر گاڑیوں کو آگ لگا دی، شاہراہیں بلاک کر دیں اور سکیورٹی فورسز پر حملوں کی اطلاعات بھی موصول ہوئیں۔ صورتِ حال کے پیش نظر جالسکو کے گورنر پابلو لیموس ناورو نے شہریوں کو گھروں تک محدود رہنے اور غیر ضروری نقل و حرکت سے گریز کی ہدایت کی ہے۔حکام کے مطابق سکیورٹی فورسز کو ہائی الرٹ کر دیا گیا ہے جبکہ حساس تنصیبات، ہوائی اڈوں اور سرکاری عمارتوں کی سکیورٹی مزید سخت کر دی گئی ہے۔
امریکی ردعمل اور سفری پابندیاں
میکسیکو میں یہ کارروائی ایسے وقت میں کی گئی جب امریکا کی جانب سے منشیات کے خلاف سخت اقدامات کے لیے دباؤ بڑھایا جا رہا تھا۔ میکسیکو کی صدر کلاؤڈیا شین باؤم کی حکومت کو واشنگٹن کی جانب سے واضح پیغام دیا گیا تھا کہ منشیات کے کارٹیلز کے خلاف فیصلہ کن کارروائیاں کی جائیں۔امریکی نائب وزیر خارجہ کرسٹوفر لینڈاؤ نے ایل مینچو کی ہلاکت کو خطے میں امن و امان کے لیے “بڑی پیش رفت” قرار دیا ہے۔ امریکی حکام نے اپنے شہریوں کے لیے احتیاطی سفری الرٹ بھی جاری کر دیا ہے۔دوسری جانب سکیورٹی خدشات کے باعث کینیڈین ایئرلائن Air Canada نے ساحلی سیاحتی شہر Puerto Vallarta کے لیے پروازیں عارضی طور پر معطل کرنے کا اعلان کیا ہے۔
ماہرین کی رائے
تجزیہ کاروں کا کہنا ہے کہ اگرچہ ایل مینچو کی ہلاکت کارٹیل نیٹ ورک کے لیے بڑا دھچکا ہے، تاہم اس سے قلیل مدت میں طاقت کے خلا اور مزید تشدد کا خدشہ بھی پیدا ہو سکتا ہے۔ ماضی میں بھی کارٹیل سربراہان کی گرفتاری یا ہلاکت کے بعد مختلف دھڑے آپس میں برسرِ پیکار ہو گئے تھے جس سے بدامنی میں اضافہ ہوا۔حکام کا کہنا ہے کہ سکیورٹی آپریشن جاری رہے گا اور ملک میں امن کی بحالی تک سخت اقدامات کیے جائیں گے، جبکہ شہریوں سے اپیل کی گئی ہے کہ وہ سرکاری ہدایات پر عمل کریں اور افواہوں سے گریز کریں۔
