بھارتی میڈیا کے مطابق غیر سرکاری غیر حتمی نتائج کے مطابق ریاست مدھیہ پردیش، راجستھان اور چھتیس گڑھ میں بی جے پی کامیاب رہی جب کہ تلنگانہ میں اپوزیشن جماعت کانگریس نے کامیابی حاصل کی۔
بھارتی میڈیا کے مطابق ریاست مدھیہ پردیش میں بی جے پی نے 230 میں سے 163 اور کانگریس نے 66 نشستوں پر کامیابی حاصل کی جب کہ دیگر کو صرف ایک نشست ملی۔ 2018 کے انتخابات میں بی جے پی نے 109 اور کانگریس نے 114 سیٹوں پر کامیابی حاصل کی تھی۔
بی جے پی نے راجستھان کی 199 سیٹوں میں سے 115 سیٹیں جیتی ہیں، جب کہ کانگریس نے 70 سیٹیں جیتی ہیں اور دیگر امیدواروں نے 14 سیٹیں جیتی ہیں۔ 2018 میں راجستھان سے کانگریس کو 100 اور بی جے پی کو 73 سیٹیں ملی تھیں۔
چھتیس گڑھ میں 90 نشستوں کے انتخابات میں بی جے پی نے 54 اور کانگریس نے 35 سیٹیں جیتی ہیں، جب کہ دیگر نے صرف ایک سیٹ جیتی۔ 2018 میں کانگریس نے 68 سیٹیں جیتی تھیں جبکہ بی جے پی کو صرف 15 سیٹیں ملی تھیں۔
بھارتی میڈیا کے مطابق ریاست تلنگانہ میں 119 نشستوں پر ہونے والے الیکشن میں کانگریس 65 نشستیں حاصل کرنے میں کامیاب رہی، بھارتیہ راشٹرا سمیتی (بی آر ایس) کو 39 اور بی جے پی کو صرف 8 نشستیں ملیں۔
2018 کے راجستھان انتخابات میں، بی آر ایس نے 88 سیٹیں جیت کر ریاست میں حکومت بنائی، جب کہ کانگریس نے 19 سیٹیں جیتیں اور آل انڈیا مجلس اتحاد المسلمین نے بھی 7 سیٹیں جیتیں، لیکن بی جے پی ایک بھی سیٹ جیتنے میں ناکام رہی۔
چاروں ریاستوں میں گزشتہ ماہ ووٹنگ ہوئی تھی۔ بھارت میں اگلے سال مئی میں عام انتخابات ہوں گے۔
مدھیہ پردیش، چھتیس گڑھ، تلنگانہ اور راجستھان میں آج سرکاری طور پر نتائج کا اعلان کیا جائے گا۔
