اردوورلڈ کینیڈا( ویب نیوز)وفاقی وزیر داخلہ محسن نقوی کا کہنا ہے کہ دہشت گردوں کے خاتمے کیلئے مکمل انتظامات کیے جائیں گے۔
لاہور کے قذافی اسٹیڈیم میں پریس کانفرنس کرتے ہوئے وفاقی وزیر داخلہ محسن نقوی کا کہنا تھا کہ دہشت گردوں کے اور بھی عزائم تھے جنہیں فورسز نے ناکام بنادیا، یہ حملے باقاعدہ منصوبہ بندی کے تحت ہوئے، ہم اس معاملے پر واضح ہیں کہ یہ دہشت گردوں کا حملہ ہے۔
انہوں نے کہا کہ بلوچستان میں حملے میں ہمارے 14 جوان شہید ہوئے ہیں جب کہ ہم نے 21 دہشت گردوں کو ہلاک کیا ہے۔
محسن نقوی نے کہا کہ جس نے حملہ کیا وہ دہشت گرد ہے، یہ ہماری کسی خفیہ ایجنسی کی ناکامی نہیں، تحریک طالبان دہشت گردی میں ملوث ہے۔
وفاقی وزیر داخلہ نے واضح کیا کہ بیرونی قوتیں بلوچستان میں عدم استحکام پیدا کرنا چاہتی ہیں، جو بھی حملوں کی حمایت کر رہا ہے وہ دہشت گرد ہے۔ محسن نقوی نے کہا کہ کالعدم ٹی ٹی پی دہشت گردی میں ملوث ہے، جن کو رہا کیا گیا وہ دہشت گردی میں ملوث ہیں۔