اردوورلڈکینیڈا( ویب نیوز)وفاقی وزیر داخلہ محسن نقوی نے واضح کیا ہے کہ مدارس یا مساجد کی بندش سے متعلق تمام خبریں بے بنیاد ہیں اور کسی بھی مدرسے یا مسجد کو بند کرنے کا کوئی ارادہ نہیں۔

کراچی میں چیئرمین سنی تحریک محمد ثروت اعجاز قادری سے ملاقات کے دوران، ان کے ہمراہ سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی موجود تھے۔ ملاقات میں علمائے کرام کی خدمات کو سراہا گیا اور مذہبی ہم آہنگی اور اتحاد کے فروغ پر زور دیا گیا۔

وفاقی وزیرداخلہ محسن نقوی کی سنی تحریک کے چیئرمین محمد ثروت اعجاز قادری سے ملاقات
سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی وزیرداخلہ کے ہمراہ تھے

ملاقات میں علمائے کرام کی گراں قدر خدمات کو خراج تحسین پیش کیا گیا pic.twitter.com/J27A4sxUEG

— Ministry of Interior GoP (@MOIofficialGoP) October 22, 2025

محسن نقوی نے کہا کہ اسلام امن و محبت کا دین ہے اور ہر شہری کو قانون کے دائرے میں پرامن احتجاج کا حق حاصل ہے، تاہم ملک میں تشدد اور شرپسندی کی کوئی گنجائش نہیں۔

انہوں نے مزید کہا کہ علمائے کرام نے ہمیشہ حق کے ساتھ کھڑے ہو کر اہم کردار ادا کیا، پاکستان اب ترقی کی راہ پر گامزن ہے، اور اس موقع پر سب کو مثبت کردار ادا کرتے ہوئے متحد ہونا چاہیے۔

چیئرمین سنی تحریک ثروت اعجاز قادری نے بھی مذہبی ہم آہنگی کے فروغ میں مکمل تعاون کی یقین دہانی کروائی۔