اردوورلڈ کینیڈا( ویب نیوز)پاکستان میں پری مون سون بارشوں کا ایک نیا سلسلہ شروع ہو رہا ہے، جو اگلے پانچ روز تک وقفے وقفے سے ہلکی اور تیز بارشوں کے ساتھ تیز ہواؤں کا امکان ظاہر کرتا ہے۔
محکمہ موسمیات کے مطابق آج شدید حبس میں رہے گا، جبکہ دوپہر میں بارش کا امکان ہے۔ رات کے اوقات میں یہ بارش تیز ہو سکتی ہے، جس سے شہریوں کو گرمی سے کچھ ریلیف ملے گا
لیکن ساتھ ہی نکاسی آب کے نظام کی کمزوری صورتحال کو سنگین بنا سکتی ہے۔ لاہور میں آج کم سے کم درجہ حرارت 26 °C اور زیادہ سے زیادہ 32 °C متوقع ہے ۔
گزشتہ روز کی بارش نے شہر میں ترقیاتی کاموں کو متاثر کیا، جس سے سڑکوں پر پانی جمع ہونے کے باعث آمد و رفت میں دشواری پیدا ہوئی۔ لاہور ڈیویلپمنٹ اتھارٹی نے 30 جون تک جاری تعمیری کام مکمل کرنے کی مہم چلائی تھی، جبکہ واسا نے اسے 31 جولائی تک مکمل کرنے کا وعدہ کیا ہے۔
شہریوں کا کہنا ہے کہ اگر یہ منصوبے بروقت مکمل نہ ہوئے تو مون سون کے دوران صورتحال مزید بگڑ سکتی ہے۔ محکمہ موسمیات نے صوبائی اور بلدیاتی اداروں کو الرٹ رہنے اور نکاسی آب کا نظام بہتر بنانے کی ہدایت کی ہے، خاص طور پر موسمی طوفان، آندھی اور تیز بارش کے دوران ممکنہ شہری بہاؤ سے نمٹنے کے لیے اس طرح نہ صرف شہریوں کو گرمی کی شدت سے عارضی ریلیف ملے گا بلکہ بیک وقت حکومتی انتظامات سے ممکنہ خطرات سے نمٹنے کی تیاری بھی کی جاسکتی ہے۔
