غیر ملکی خبر رساں اداروں کے مطابق جنگ بندی کے پانچویں روز مزید قیدیوں کو رہا کیا جائے گا۔ حماس نے آج رہا کیے جانے والے 10 اسرائیلی قیدیوں کی فہرست اسرائیلی وزیراعظم کے دفتر کو ارسال کر دی ہے۔اسرائیل اور حماس کے درمیان 4 روزہ عارضی جنگ بندی معاہدے کے دوران حماس نے 69 اسرائیلی قیدیوں کو رہا کیا جب کہ اسرائیل نے 150 فلسطینیوں کو رہا کیا۔ قطر اور مصر کی ثالثی میں ہونے والے جنگ بندی معاہدے میں مزید 2 دن کی توسیع کر دی گئی ہے۔

فلسطینی وزارت صحت کی جانب سے جاری کردہ بیان کے مطابق قابض اسرائیلی فوج نے مقبوضہ مغربی کنارے کے علاقے رملہ میں جیل کے باہر اپنے پیاروں کی رہائی کے منتظر سینکڑوں فلسطینیوں کو تشدد کا نشانہ بنایا۔ اسرائیلی فوج کے تشدد سے متعدد فلسطینی زخمی ہو گئے۔7 اکتوبر سے اب تک غزہ پر اسرائیل کے وحشیانہ حملوں میں 15 ہزار سے زائد فلسطینی شہید ہوچکے ہیں، شہداء میں بڑی تعداد بچوں کی ہے۔