ذرائع کے مطابق ماڑی پور کے علاقے میں بڑی کارروائی کے دوران چینی اور دیگر اجناس کی 2 لاکھ سے زائد چھپائی گئی بوریاں برآمد کر لی گئی ہیں، مذکورہ اشیاء غیر قانونی طور پر افغانستان سمگل کی جانی تھیں۔ ذرائع کے مطابق حساس ادارے، پولیس اور ڈی سی کیماڑی نے مشترکہ کارروائی کرتے ہوئے گودام سے چینی کی 2 لاکھ بوریاں، ڈیڑھ ارب روپے مالیت کا کالا اور سفید چنا برآمد کر لیا۔
ماڑی پور کے علاقے موچکو میں ایک گودام پر چھاپہ مارا گیا، جس کے دوران گودام سے چینی کی لاکھوں بوریاں برآمد کر لی گئیں۔ پولیس ذرائع کے مطابق برآمد ہونے والی اشیاء کی مالیت ڈیڑھ ارب روپے سے زائد ہے، چھاپے کے دوران مکئی، سفید اور کالے چنے کی بوریاں بھی برآمد ہوئیں، جنہیں ایک گودام میں رکھا گیا تھا۔
ڈی سی کیماڑی اور ان کی ٹیم نے کارروائی کے بعد گودام کو سیل کر دیا جب کہ چھاپے میں گودام پر کام کرنے والے 4 افراد کو حراست میں لے لیا گیا ہے اور ان سے گودام کے مالکان کے حوالے سے پوچھ گچھ کی جا رہی ہے۔
ڈپٹی کمشنر جنید اقبال خان کا کہنا ہے کہ یہ ذخیرہ اندوزی پاکستان میں مصنوعی بحران پیدا کرنے کے لیے کی گئی، چھاپے میں چینی کے ایک لاکھ تھیلے، کالے اور سفید چنے کے ایک لاکھ تھیلے برآمد کیے گئے ہیں
اس حوالے سے ایس ایس پی کیماڑی عارف اسلم راؤ کا کہنا ہے کہ حساس ادارے کی اطلاع پر ڈی سی کیماڑی کے ہمراہ موچکو تھانے کی حدود میں ایک بڑے گودام پر چھاپہ مارا گیا۔ گودام کے مالکان کی شناخت کر لی گئی
ہے جنہیں جلد گرفتار کر لیا جائے گا، چھاپے میں گودام پر کام کرنے والے 4 افراد کو حراست میں لے لیا گیا ہے۔
