اردو ورلڈ کینیڈا ( ویب نیو ز ) ہفتے کے روز حزب اللہ نے اپنے رہنما کی شہادت کی تصدیق کرتے ہوئے کہا کہ اسرائیل کے خلاف جنگ جاری رہے گی، غزہ اور فلسطین کی حمایت اور لبنان کے دفاع کے لیے اپنا جہاد جاری رکھیں گے۔عراقی رہنماؤں آیت اللہ سیستانی اور مقتدیٰ الصدر نے حسن نصر اللہ کی شہادت پر اپنے گہرے رنج و غم کا اظہار کیا ہے۔رپورٹ کے مطابق عراق میں 3 روزہ اور ایران میں 5 روزہ سوگ کا اعلان کیا گیا ہے۔ایران کے سپریم لیڈر آیت اللہ خامنہ ای نے کہا ہے کہ صیہونی حکومت کے حکمراں دہشت گرد گروہ نے غزہ میں جاری مجرمانہ جنگ سے کوئی سبق نہیں سیکھا۔
تمام مسلمانوں کا فرض ہے کہ وہ لبنان اور حزب اللہ کے ساتھ کھڑے ہوں۔رپورٹ کے مطابق ایرانی وزارت خارجہ نے کہا کہ حسن نصر اللہ کا مقبوضہ بیت المقدس کو آزاد کرانے کا مشن جاری رہے گا۔دوسری جانب ترک صدر رجب طیب اردوان نے کہا کہ اسرائیل نے نسل کشی، قبضے اور جارحیت کی اپنی پالیسی کا نیا ہدف لبنان کو بنایا ہے، عالمی ادارے اسرائیل کو روکیں۔دوسری جانب روس نے بھی حسن نصراللہ کی شہادت کی شدید مذمت کرتے ہوئے اسرائیل سے حملے بند کرنے کا مطالبہ کیا ہے۔
