اردو ورلڈکینیڈا ( ویب نیوز ) ہاشم صفی الدین کی شہادت کے بعد حزب اللہ نے نعیم قاسم کو نیا سربراہ مقرر کر دیا ہے۔ حسن نصر اللہ کی شہادت کے ایک ماہ بعد لبنان کی مزاحمتی تنظیم حزب اللہ نے نعیم قاسم کو اپنا باضابطہ سربراہ منتخب کر لیا ہے۔ نعیم قاسم طویل عرصے تک حسن نصر اللہ کے نائب رہے اور حسن نصر اللہ کی شہادت کے بعد انہیں تنظیم کا قائم مقام سربراہ بنایا گیا جب کہ وہ اس سے قبل مسلسل 3 مرتبہ حزب اللہ کی شوریٰ کمیٹی کے رکن رہ چکے ہیں۔
حسن نصر اللہ کی شہادت کے بعد اس بات کا قوی امکان تھا کہ ان کے کزن اور داماد ہاشم صفی الدین کو حزب اللہ کا سربراہ منتخب کیا جائے تاہم صفی الدین بھی چند روز قبل اسرائیلی حملے میں شہید ہو گئے تھے۔واضح رہے کہ حسن نصراللہ جو کہ طویل عرصے تک حزب اللہ کے سیکرٹری جنرل اور سربراہ رہے، گزشتہ ماہ اسرائیلی حملے میں شہید ہوگئے تھے۔
