اردوورلڈ کینیڈا( ویب نیوز)مسلم لیگ (ن) کے صدر اور سابق وزیراعظم نواز شریف نے سپریم کورٹ کے مخصوص نشستوں سے متعلق فیصلے اور سیاسی صورتحال پر اتحادی جماعتوں سے رابطے کا فیصلہ کیا ہے۔
تفصیلات کے مطابق پاکستان مسلم لیگ (ن) کے صدر میاں محمد نواز شریف نے اتحادیوں سے رابطے کا فیصلہ کیا ہے، جس میں وہ مخصوص نشستوں کے حوالے سے سپریم کورٹ کے حالیہ فیصلے پر اتحادی رہنماؤں سے مشاورت کریں گے۔
ذرائع کے مطابق سپریم کورٹ کے فیصلے کے بعد کی سیاسی صورتحال کا اتحادی جماعتوں کے رہنماؤں کی مشاورت سے ازسرنو جائزہ لیا جائے گا۔
لیگی ذرائع کا کہنا ہے کہ نواز شریف نے اپنی پارٹی کی سینئر قیادت کے اجلاس سے قبل اتحادی جماعتوں سے رابطے کا فیصلہ کیا ہے اور وہ خود تمام جماعتوں کے رہنماؤں سے رابطہ کریں گے۔
ذرائع کا کہنا ہے کہ نواز شریف بلوچستان کی اتحادی جماعتوں کی قیادت سے بھی رابطہ کریں گے جن میں صدر آصف علی زرداری، چوہدری شجاعت حسین اور مولانا فضل الرحمان، ایم کیو ایم اور عوامی نیشنل پارٹی شامل ہیں اور تمام اتحادی رہنماؤں سے رابطے اور مشاورت کے بعد آئندہ کا لائحہ عمل طے کریں گے۔