اردوورلڈ کینیڈا ( ویب نیوز )بلاول بھٹو نے کہا کہ میں صرف ایوان کے معاملات پر سابق صدر آصف زرداری کے بیانات کا پابند بیانات کا مطلب زرداری سے پوچھا جائے۔

بلاول بھٹو زرداری نے کہا کہ پاکستان میں جب بھی ضرورت پڑی عوام نے قربانیاں دیں اور اب انہیں پوچھنے کا حق ہے کہ حکومت عوام کے لیے کیا کر رہی ہے۔ نگرانوں پر کوئی اعتراض نہیں لیکن انہیں چیئر ٹیکر نہیں بننا چاہیے۔ ملک کے معاشی مسائل اتنے سنگین ہیں کہ انہیں نگران حکومت حل نہیں کر سکتی۔ لوگوں کے چہروں پر لکھا ہے کہ وہ مصیبت اور تکلیف میں ہیں ۔

حیدرآباد میں کارکنوں سے خطاب کرتے ہوئے بلاول نے کہا کہ کہا جا رہا ہے کہ 90 دن میں الیکشن نہیں ہو سکتے، 90 دن بہت دور ہیں، الیکشن 60 دن میں ہونے چاہیے تھے۔ کیا 100 دن میں الیکشن ہوں گے، کیا 120 دن میں الیکشن ہوں گے؟

انہوں نے کہا کہ عوام مشکلات کا شکار ہیں،معیشت خراب ہو رہی ہے، لوگ پریشان ہیں کہ اپنے بچوں کو سکول کیسے بھیجیں، بوڑھوں کا علاج کیسے کریں؟

واضح رہے کہ ایک بیان میں سابق صدر آصف زرداری کا کہنا تھا کہ الیکشن کمیشن آئین کے مطابق الیکشن کرائے گا اور مردم شماری کے بعد الیکشن کمیشن نئی حلقہ بندیاں کرنے کا پابند ہے۔ ہمیں چیف الیکشن کمشنر اور تمام ممبران پر مکمل اعتماد ہے۔

انہوں نے کہا کہ ملک اس وقت معاشی بحران سے گزر رہا ہے، ہم سب کو سیاست کی بجائے معیشت کی فکر کرنی چاہیے، ملک ہے تو ہم سب ہیں۔