اردوورلڈ کینیڈا( ویب نیوز)آرمی چیف جنرل سید عاصم منیر کی زیر صدارت کور کمانڈرز کانفرنس میں فورم نے اس عزم کا اظہار کیا کہ فوج میں کوئی بھی فرد احتساب کے سخت نظام سے مستثنیٰ نہیں ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے کے مطابق آرمی چیف جنرل سید عاصم منیر کی زیر صدارت کور کمانڈرز کانفرنس ہوئی۔
کور کمانڈرز نے پاکستان کے امن و استحکام کے لیے لازوال قربانیوں پر پاک فوج دیگر قانون نافذ کرنے والے اداروں اور بلوچستان اور خیبرپختونخوا میں پاکستانی شہریوں کے شہداء کو زبردست خراج عقیدت پیش کیا۔۔
آئی ایس پی آر کے مطابق فورم کو خطے کی صورتحال، قومی سلامتی کو درپیش چیلنجز اور بڑھتے ہوئے خطرات کے جواب میں آپریشنل حکمت عملی پر بریفنگ دی گئی۔
فورم نے ملک دشمن قوتوں، منفی اور تخریبی عناصر اور ان کے پاکستان دشمن اندرونی و بیرونی سہولت کاروں کے ملک خصوصاً بلوچستان اور خیبرپختونخوا میں عروج پر اور اس سے نمٹنے کے لیے اٹھائے جانے والے مختلف اقدامات پر بھی غور کیا۔
پاک فوج کے شعبہ تعلقات عامہ کے مطابق فورم نے اس بات کا اعادہ کیا کہ پاک فوج عوام کی غیر متزلزل حمایت سے انسداد دہشت گردی کے لیے دی جانے والی قربانیوں کو رائیگاں نہیں جانے دے گی۔ ہر فرد کی پیشہ وارانہ مہارت اور وفاداری صرف ریاست اور افواج پاکستان کے ساتھ ہے۔
کانفرنس کے شرکاء کا کہنا تھا کہ پاک فوج مضبوط اور کڑے احتساب کے ذریعے غیر متزلزل عزم کے ساتھ اپنی اقدار کو برقرار رکھتی ہے جس میں کسی قسم کی جانبداری اور استثنیٰ کی کوئی گنجائش نہیں ہے۔
کور کمانڈرز نے کہا کہ فوج میں احتساب کے سخت نظام کا نفاذ ادارے کے استحکام کے لیے ضروری ہے اور کوئی فرد اس عمل سے بالاتر اور مستثنیٰ نہیں ہو سکتا۔
100
