اردو ورلڈ کینیڈا (ویب نیوز ) وفاقی وزیر داخلہ رانا ثنا اللہ نے کہا ہے کہ کسی کو وفاقی دارالحکومت میں دھاوا بولنے کی اجازت نہیں دی جائے گی۔
پریس کانفرنس سے خطاب کرتے ہوئے رانا ثنا اللہ کا کہنا تھا کہ پولیس اور رینجرز کی بھاری نفری حکومت کے اختیار میں ہے تاہم نقصان کو کم سے کم کرنے کے لیے طاقت کے محتاط استعمال کی ہر ممکن کوشش کی جائے گی۔
وفاقی وزیر نے مزید کہا کہ حکومت نے ملک کو بحران سے نکالنے کے لیے سخت فیصلے کیے جس کی وجہ سے وہ ملک میں بڑھتی ہوئی مہنگائی کو کنٹرول کرنے میں ناکام رہی۔
مسلم لیگ ن کے رہنما نے آئی ایم ایف پروگرام کی بحالی میں تاخیر کا ذمہ دار عمران خان کو ٹھہرایا اور دعوی کیا کہ اتحادی حکومت نے ملک کی خاطر اپنی سیاست قربان کردی۔
انہوں نے مزید کہا کہ عمران خان کے بیانیے کی کوئی اہمیت نہیں اور پنجاب میں پی ٹی آئی کی حکومت کو ہٹانا کوئی مشکل کام نہیں اور اس کے حصول کے لیے کئی آپشنز موجود ہیں۔
وزیر داخلہ نے مزید کہا کہ اسحاق ڈار کی واپسی سے حکومتی اقتصادی ٹیم مضبوط ہوگی۔ انہوں نے یہ بھی دعوی کیا کہ مسلم لیگ ن کے قائد نواز شریف انتخابات سے قبل پاکستان واپس آئیں گے۔
