اردوورلڈ کینیڈا ( ویب نیوز )نگران وزیراعظم انوار الحق کاکڑ نے کہا ہے کہ کسی کو معاشرے کو یرغمال بنانے کی اجازت نہیں دی جائے گی۔گلگت میں کارڈیالوجی انسٹی ٹیوٹ میں او پی ڈی کے افتتاح کے موقع پر گفتگو کرتے ہوئے نگرا ت وزیراعظم کا کہنا تھا کہ پاکستان کے اندر کسی اور ملک کی کوئی ایجنسی نہیں ہوگی، صرف ملکی اداروں کا اثر ہوگا
انہوں نے کہا کہ گلگت بلتستان کے تمام مسائل آئینی طریقے سے حل کریں گے، آئینی سوالات کے جوابات ڈھونڈے جا رہے ہیں اور جلد عوام تک پہنچائیں گے۔
انوار الحق کاکڑ نے کہا کہ کسی سیٹ کے لیے بولی نہیں لگائی گئی، ہم بولیاں لگانے نہیں بلکہ بولی کا گلا گھونٹنے آئے ہیں۔
نگراں وزیراعظم نے کہا کہ میں گلگت کے عوام کے لیے ایک دوسرے کے حقوق کا احترام کرنے، دانشمندی سے خلیج کو پر کرنے کا پیغام لے کر آیا ہوں، گلگت کے معاشرے اور اقدار میں بھائی چارہ ہے۔
انوار الحق کاکڑ نے کہا ہے کہ گلگت کے باسیوں نے بڑی محبت سے استقبال کیا، گلگت بلتستان ہر رنگ و نسل کے لوگوں کا گلدستہ ہے۔
انہوں نے کہا کہ گلگت بلتستان کے عوام کے حوصلے پہاڑوں کی طرح ہیں، دنیا بھر سے لوگ یہاں سیاحت کی غرض سے آتے ہیں، گلگت بلتستان کی ترقی کے لیے مختلف لوگوں سے ملاقاتیں بھی کی ہیں۔
انوار الحق کاکڑ نے مزید کہا کہ ایک دوسرے کے حقوق کا احترام ضروری ہے، حقوق کے نفاذ کی ذمہ داری ریاست کی ہے۔ اور ہمت کے ساتھ ان دوریوں کو ختم کریں گے۔
قبل ازیں انوارالحق کاکڑ نے گلگت بلتستان کے پہلے اور واحد کارڈیالوجی ہسپتال کی او پی ڈی کا افتتاح کیا، یہ 50 بستروں پر مشتمل ہسپتال ہے جو کہ امراض قلب کی جدید سہولیات سے آراستہ ہے۔
