اردو ورلڈ کینیڈا ( ویب نیوز )وزیراعظم شہباز شریف کو 9 مئی کو ہونے والے آتشزدگی میں ملوث افراد کی گرفتاریوں اور ان کے خلاف قانونی کارروائی کے بارے میں بریفنگ دی گئی۔
لاہور میں وزیراعظم شہباز شریف کی زیر صدارت اعلی سطح کا اجلاس ہوا جس میں نگر ان وزیراعلی پنجاب، سیکیورٹی حکام نے شرکت کی۔ بریفنگ دی گئی۔
وزیراعظم نے کہا کہ کسی بے گناہ کے ساتھ زیادتی نہیں ہوگی، لیکن کوئی مجرم سزا سے نہیں بچ سکے گا۔
ملاقات میں آڈیو لیکس کا معاملہ بھی زیر بحث آیا، جس پر وزیراعظم نے کہا کہ جوڈیشل کمیشن کی رپورٹ آنے کے بعد دودھ کا دودھ پانی کا پانی ہو جائے گا۔
اجلاس میں شریک اعظم نذیر تارڑ نے کہا کہ کمیشن سچائی جاننے کے لیے آڈیوز کا فرانزک آڈٹ کر سکتا ہے۔
وزیراعظم نے کہا کہ کابینہ نے کمیشن آف انکوائریز ایکٹ 2017 کے تحت آڈیو لیکس کمیشن قائم کیا، عمران نیازی نے اپنی ضد اور انا کی وجہ سے ملک کو بہت نقصان پہنچایا۔
شہباز شریف نے وزرا کو ہدایت کی کہ وہ ملک و قوم کو ایک ساتھ لانے، حالات کی بہتری، اداروں اور عوام میں اعتماد کی فضا کو برقرار رکھنے کے لیے سخت محنت کریں۔
شہباز شریف نے ہدایت کی کہ بجٹ میں عوام کو ریلیف دینے کے لیے اقدامات کیے جائیں، مہنگائی کے اس دور میں غریبوں کو بڑا ریلیف دینے کی کوشش کر رہے ہیں۔
