اردوورلڈکینیڈا(ویب نیوز)بالائی علاقوں میں شدید برفباری کا نیا سلسلہ شروع ہو گیا ہے، جس کے دوران آسمان سے برف کے گالے برستے رہے اور ہر چیز سفید چادر میں ڈھک گئی۔ وادی نیلم میں پانچ سال کا برفباری کا ریکارڈ ٹوٹ گیا اور بالائی نیلم میں چھ فٹ سے زائد برف ریکارڈ کی گئی، جس نے علاقے کی روزمرہ زندگی کو بری طرح متاثر کیا۔
ملکہ کوہسار مری اور گلیات میں سیاح برفباری کا لطف اٹھا رہے ہیں، تاہم مری میں شدید برفباری کی وجہ سے مال روڈ، جھیکا گلی اور نتھیا گلی سیاحوں کے لیے بند کر دی گئی ہیں، صرف مقامی بکنگ والے ہی ان علاقوں میں جا سکتے ہیں۔ اس کے علاوہ کوئٹہ، قلات، مستونگ، کان مہتر زئی، مسلم باغ، چمن، وادی نیلم، باغ، سدھن گلی، گنگا چوٹی، نیزہ گلی اور تولی پیر میں بھی زمین سفید چادر سے ڈھک گئی ہے۔
شدید برفباری کی وجہ سے کئی اہم شاہراہیں بلاک ہو گئی ہیں، جن میں گریس ویلی اور شونٹر ویلی کی سڑکیں بھی شامل ہیں۔ نانگا پربت اور بابوسر ٹاپ پر دس فٹ سے زیادہ برف پڑ چکی ہے، جس کے باعث لوگ گھروں میں محصور ہو گئے ہیں۔ باغ میں برفانی تودہ گرنے سے ایک شخص جاں بحق ہوا اور متعدد گاڑیوں کو نقصان پہنچا۔ وادی نیلم اور لیپہ میں لینڈ سلائیڈنگ کے نتیجے میں 13 گھر مکمل طور پر تباہ اور 28 گھر جزوی متاثر ہوئے۔
برفباری کے بعد بند وادی لیپہ کی شاہراہ کو بحال کر دیا گیا ہے، تاہم گلیات کے بیشتر علاقوں میں چار دن گزرنے کے باوجود بجلی کی بحالی ممکن نہیں ہو سکی، اور رابطہ سڑکیں بھی مکمل طور پر کھل نہیں سکیں۔ سڑکوں کی بندش کی وجہ سے خوراک اور ادویات کی شدید قلت پیدا ہو گئی ہے، جبکہ ناران، کاغان، کالام اور چترال میں سڑکیں بند ہونے کا خدشہ برقرار ہے۔ مالم جبہ میں برفباری نے سیاحوں کو اپنی طرف متوجہ کر لیا ہے۔
پنجاب کے مختلف علاقوں میں بھی موسم سرد ہو گیا ہے اور لاہور سمیت دیگر شہروں میں بارش ریکارڈ کی گئی۔ بالائی علاقوں میں درجہ حرارت نقطہ انجماد سے نیچے جا چکا ہے؛ لہہ میں منفی 12، زیارت میں منفی 8، استور، گوپس اور پارا چنار میں منفی 7 ریکارڈ کیا گیا۔ مالم جبہ، قلات اور راولا کوٹ میں پارا منفی 5 رہا، جبکہ کراچی اور لاہور میں بالترتیب کم سے کم درجہ حرارت 11 اور 7 ڈگری ریکارڈ ہوا۔
دوسری جانب این ڈی ایم اے نے خیبرپختونخوا، گلگت بلتستان، آزاد کشمیر اور بلوچستان کے پہاڑی علاقوں میں لینڈ سلائیڈنگ کے ممکنہ خطرے سے آگاہ کر دیا ہے۔ دیر، سوات، کالام، چترال، کوہستان، شانگلہ، ایبٹ آباد اور مانسہرہ میں شدید لینڈ سلائیڈنگ کا خطرہ ہے، جبکہ مری، گلیات، استور، ہنزہ، باغ اور مظفرآباد کے پہاڑی علاقوں میں بھی اس کا خدشہ برقرار ہے۔ اس کے علاوہ کوئٹہ، زیارت، قلعہ عبداللہ، نوشکی، قلات، مستونگ، پنجگور اور خضدار میں بھی زمین کھسکنے کا امکان ہے۔
این ڈی ایم اے نے شہریوں کو ہدایت کی ہے کہ برفباری اور بارش کے دوران غیر ضروری سفر سے گریز کریں اور محفوظ رہنے کے اقدامات اختیار کریں۔
