اردو ورلڈ کینیڈا ( ویب نیو ز) شمالی کوریا کے رہنما نے امریکا کی دھمکیوں کو نظر انداز کیا اور متوقع ہتھیاروں کے معاہدے کے لیے روس پہنچ گئے۔

بین الاقوامی خبر رساں اداروں کے مطابق شمالی کوریا کے رہنما کم جونگ ان اپنے اہم دورے پر روس پہنچ گئے ہیں جہاں وہ ولادی ووستوک میں روسی صدر ولادی میر پیوٹن سے ملاقات کریں گے۔

شمالی کوریا اور روس کے رہنماؤں کے درمیان ہونے والی اس اہم ملاقات میں ہتھیاروں کا معاہدہ متوقع ہے۔ واضح رہے کہ ایک روز قبل امریکا نے دھمکی دی تھی کہ روس کو ہتھیاروں کی فروخت کے ممکنہ معاہدے کی صورت میں شمالی کوریا پر مزید پابندیاں عائد کی جائیں گی۔
میڈیا ذرائع کے مطابق بائیڈن انتظامیہ کا کہنا ہے کہ یوکرین پر حملے کی ناکام کوشش کرنے والے روسی صدر ولادی میر پیوٹن شمالی کوریا کے رہنما کم جونگ ان سے ہتھیاروں کی بھیک مانگ رہے ہیں۔ امریکی محکمہ خارجہ کے ترجمان میتھیو ملر کے مطابق امریکا یوکرین میں روس کی فوجی مہم میں مدد کرنے والوں سے جواب طلب کرے گا۔ انہوں نے پیر کو کہا کہ شمالی کوریا کی جانب سے روس کو ہتھیاروں کی فراہمی اقوام متحدہ کی سلامتی کونسل کی قراردادوں کی صریح خلاف ورزی ہوگی۔